Qýandyq Bıshimbaev kolonııada jumys istese qansha jalaqy alady?

Foto: ashyq derekkóz

24 jylǵa sottalǵan eks-mınıstr Qýandyq Bıshimbaev jaqynda kolonııaǵa jetkizilgen bolatyn. Eger ol kolonııada jumys isteıtin bolsa, jalaqysy qansha bolýy múmkin ekeni anyqtaldy, – dep habarlaıdy Skifnews.kz aqparat portaly Tengrinews.kz-ke silteme jasap.

Qylmystyq atqarý júıesi komıtetiniń málimetinshe, qazaqstandyq sottalǵandardyń eńbegi eki túrli tólenedi: ýaqytsha jáne kelisim boıynsha.

Eńbekke ýaqytsha aqy tóleý kezinde sottalǵandardyń jalaqysy belgilengen tarıftik mólsherlemege nemese naqty jumys istegen ýaqyty úshin jalaqyǵa sáıkes esepteledi. Jalaqy tóleý kezinde aqsha oryndalǵan jumystyń nemese óndirilgen ónimniń árbir birligi úshin tólenedi.

«Qylmystyq-atqarý júıesiniń kásiporyndarynda ne bıznes sýbektilerinde jumysqa ornalasqan bir sottalýshynyń ortasha jalaqysy 25 myńnan 200 myń teńgege deıin bolady», – deıdi QAJK ókilderi.

Sondaı-aq, komıtettiń málimetinshe, Qazaqstan kolonııalarynda atqarý paraqtary bar sottalǵandardy jumysqa ornalastyrý boıynsha birinshi kezektegi sharalar qabyldanyp jatyr.

«Olardyń jalaqysynan zańnamada aıqyndalǵan mólsherde (jalaqynyń nemese ózge tabystyń keminde elý paıyzy) aı saıynǵy ustap qalýlar júrgiziledi. Osylaısha, zalaldy óteý sottalǵandardyń tabysyna tikeleı baılanysty», – dep tolyqtyrdy komıtet.