«قۇدالاردان ۇيات بولادى»: تۇركىستان وبلىسىندا 55 جاستاعى ايەل توي جاساۋ ءۇشىن ەسىرتكى قويىپ كەتۋشى بولىپ جۇمىس ىستەگەن

فوتو: سكرين

بەلگىلى دوكۋمەنتاليست رينات بالعاباەۆ  «سول» ءفيلمى قالاي تۇسىرىلگەنىن ايتىپ بەردى. ونىڭ ايتۋىنشا, فيلمدە بۇرىن ەسىرتكى بيزنەسىنە قاتىسى بولعان ايەلدىڭ وقيعاسى نەگىز بولعان. بۇل تۋرالى  qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

رينات بالعاباەۆ سۇحبات بارىسىندا تۇركىستان وبلىسىنىڭ 55 جاستاعى تۋماسىنىڭ وقيعاسىن ايتىپ بەردى.

«ايەلگە توي جاساۋعا 300 مىڭ تەڭگە كەرەك بولعان. سول ۋاقىتتا ءوزى جۇمىستان شىعىپ, ال اپكەسىنىڭ قىزى تۇرمىسقا كەتۋگە دايىندالىپ جاتقان. ايەل سول كەزدە ميكروكرەديت ۇيىمىنان نەسيە الىپ, قارىزعا بەلشەسىنەن باتقان. قارىزىن جابۋ ءۇشىن جانە تويعا بەرۋ ءۇشىن جۇمىس ىزدەگەن. امالى تاۋسىلعان ول 300 مىڭ تەڭگە تابۋ ءۇشىن ەسىرتكى قويىپ كەتۋشى بولىپ جۇمىس ىستەۋگە شەشىم قابىلداعان. OLX-تە حابارلاندىرۋدى تاۋىپ, كۋرەر بولىپ جۇمىسقا كەتكەن. بىراق وسى ارادا ول 200 مىڭ تەڭگە عانا تاپقان. تابىس تاپپاي جاتىپ, كەيىن ۇستالادى», – دەدى رينات بالعاباەۆ.

ەسىرتكىنى تاسىمالداۋ مەنەدجەرلەرى ايەلدى ەكى اي بويى ۇيرەتكەن.

ء«بىرىنشى ايدا ونلاين, تەلەگرامم ارقىلى ۇيرەتىپ, 2GIS جەلىسىن قالاي قولدانۋدى كورسەتكەن. ايەل باستاپقىدا ۆيدەوعا تۇسپەۋگە شەشىم قابىلداعان. ويتكەنى وسىلاي اقشا تاپقانى تۋرالى قۇدالارى كورسە, ۇيات بولادى دەپ ويلادى. وعان ء«سىز وسى 300 مىڭ تەڭگە ءۇشىن 10 جىل بويى سوتتالىپ كەتەسىز دەپ ويلاماعانسىز با? بۇل قورقىنىشتى عوي?» دەپ ايتتىم ول مەنىڭ سۇراعىما جاۋاپ بەرىپ, «بىلمەيمىن, قالاي سىزدەردە, بىزدە وڭتۇستىكتە جاعداي باسقا. ۇيات بولادى. ەگەر مەن اقشالاي كومەكتەسپەسەم ۇيات بولادى. سەبەبى ول كەزىندە ماعان دا كومەكتەسكەن» دەپ اپكەسى تۋرالى ايتىپ بەردى», – دەدى دوكۋمەنتاليست.

ەسكە سالايىق, بۇعان دەيىن شىعىس قازاقستان وبلىسىندا ەسىرتكىنى ونلاين ساتىپ كەلگەن ەر ادامنان 20 ميلليون تەڭگە تاركىلەنگەنىن جازدىق. پوليتسيا دەپارتامەنتىنىڭ دەرەگىنشە, وسكەمەن قالاسىنىڭ 32 جاستاعى تۇرعىنى ۇستالدى. ول ءوزى وسىرگەن ماريحۋانا مەن گاشيشتى ساتۋ ءۇشىن تانىمال مەسسەندجەرلەردىڭ بىرىندە ۆەب-سايت پەن پاراقشا قۇرعان. ەسىرتكى ساتىلىمىن جاسىرىن ورىندار ارقىلى جۇزەگە اسىرعان. تولەمدى العاننان كەيىن كۇدىكتى تاۋاردى الدىن الا كەلىسىلگەن ورىندارعا قالدىرعان. ونىڭ جەر ءۇيىن ءتىنتۋ بارىسىندا پوليتسەيلەر ەسىرتكىنىڭ ءارتۇرلى تۇرلەرىن وسىرۋگە ارنالعان زەرتحانانى انىقتادى.