«كۇيەۋ جىگىت قايىن جۇرتىنا ءيىلىپ سالەم سالعان»: جەلىدە قازاقتىڭ ءداستۇرى قىزۋ تالقىعا ءتۇستى

جەلىدە كۇيەۋ جىگىتتىڭ قايىن جۇرتى الدىندا ءيىلىپ سالەم سالعانى كورسەتىلگەن فوتو تارادى. كوپشىلىك بۇل ارەكەتتى تۇرلىشە باعالاپ, قىزۋ تالقىعا سالىپ جاتىر. ءبىرى مۇنى «ەر ازاماتقا جاراسپايدى» دەسە, ەندى ءبىرى ەل ءداستۇرىنىڭ جالعاسى دەپ باعالاپ وتىر, دەپ حابارلايدى  Qandastar.kz اقپارات پورتالى Stan.kz-كە سىلتەمە جاساپ.

قازاقستاندىق بۇرىندارى كۇيەۋ بالانىڭ قايىن جۇرتىنا سالەم سالعانىن ايتىپ, Threads الەۋمەتتىك جەلىسىندە جازبا جاريالادى. سونداي-اق ول “كۇيەۋدىڭ سالەم سالۋ ءداستۇرىن قايتارۋ كەرەگىن” جەتكىزدى.

ەتنوگراف بۇلبۇل كاپقىزىنىڭ ايتۋىنشا, قازاق حالقىندا شىن مانىندە كۇيەۋ بالا قايىن جۇرتىنا بارعاندا ۇلكەندەرگە قۇرمەت رەتىندە ءيىلىپ, ءتاجىم ەتكەن.

“قازىر كۇيەۋگە سالەم سالعىزۋ سالتى ازايىپ كەتتى. كەلىن تۇسكەندە سالەم سالادى. ال كۇيەۋ وزىنەن ۇلكەندەرگە, ياعني جۇبايىنىڭ اتا-اناسىنا سالەم سالادى. قازاقتا “كۇيەۋدىڭ اتىمەن كۇل تاسى” دەگەن ماقال بار. سالەم سالىپ, ۇلكەندەردى سىيلاپ, قايىن جۇرتىنا قىزمەت جاساۋ كۇيەۋدىڭ مىندەتى.  سالەم سالعاننان وعاشتىق جوق. ادەپتەن وزباي, كۇيەۋ بالا ورنىن ءبىلۋى كەرەك”, – دەيدى ەتنوگراف.

ەتنوگرافتىڭ سوزىنشە, قازاقي تاربيە ۇلگىسىندە كۇيەۋ بالا ەشقاشان قايىن جۇرتتا باتا بەرمەيدى, ۇلكەندەردىڭ الدىنا شىعىپ سويلەمەيدى. بۇل – ادەتتىك قۇقىقتىڭ جازىلماعان, بىراق بۇلجىتپاي ورىندالاتىن ەرەجەسى.

“كۇيەۋ بالا قايىن جۇرتتىڭ وتىمەن كىرىپ, ك ۇلىمەن شىعادى. قازاقتا ء“ىلۋ” دەگەن ىرىم بار. كۇيەۋدىڭ مىندەتى وسىدان باستالادى. بىزدە قازىر ءىلۋدىڭ ورنىنا كىلەم اپارىپ ءجۇر. الايدا ول دۇرىس ەمەس. ىلۋگە شاپان اپارۋ كەرەك. ونى كۇيەۋ بالا كيىز ءۇي بولسا كەرەگەنىڭ باسىنا ىلەدى. ەگەر زاماناۋي ءۇي بولسا, كيىم ىلگىشكە ىلەدى, بۇل مەن دە سىزدەردىڭ بالالارىڭىزبىن دەگەن ماعىنانى بىلدىرەدى. كۇيەۋ بالانىڭ ەڭ العاشقى جاسايتىن ىرىمى وسى”, – دەيدى ەتنوگراف.

سونداي-اق قازاقتا كۇيەۋ بالا ۇيگە العاش كەلگەندە بوساعا مايلاپ, وتقا ماي قۇيادى. ونىڭ ماعىناسى كۇيەۋ بالا جايلى, بەرەكەلى, قىزعا جاقسى جار بولسىن دەگەن ماعىنانى بىلدىرەدى ەكەن.