قۇلبەك ەرگوبەك قوناەۆتىڭ پاتەرى وزىنە قالاي مۇرا بولىپ قالعانىن ايتتى

فوتو: massaget.kz 

قۇلبەك ەرگوبەك قوناەۆتىڭ پاتەرى وزىنە قالاي مۇرا بولىپ قالعانىن ايتتى, دەپ جازدى qandastar.kz

جازۋشى, ادەبيەت سىنشىسى, مەملەكەتتىك سىيلىقتىڭ يەگەرى قۇلبەك ەرگوبەك Adal Adal youtube ارناسىنا بەرگەن سۇحباتىندا مەملەكەت قايراتكەرى دىنمۇحامەد قوناەۆ عالىم بەيسەمباي كەنجەباەۆقا ءوزىنىڭ پاتەرىن بەرگەنىن ايتتى.

«قوناەۆ 1961 جىلى ءوزى كىرەيىن دەپ تۇرعان پاتەردى بەيسەمباي كەنجەباەۆقا سىيلايدى. ول بىلاي بولعان. بەيسەكەڭ ديمەكەڭە كىرىپ جاعدايىن ايتقاندا «سىزدەن ۇيات بولدى-اۋ» دەپتى قوناەۆ. «ماعان پاتەر بەرىلەيىن دەپ جاتىر, باسارىقتىڭ تومەنگى جاعىنان (قازىرگى تولەباەۆ-قابانباي باتىر كوشەلەرىنىڭ قيىلىسى). سونى ءسىز الىڭىز» دەپ ءتورت بولمەلى پاتەردى بەرگەن. سوسىن ديمەكەڭ بەيسەكەڭە قۋدالانىپ جۇرگەنىنە قاراماستان لەنين وردەنىن اپەرگەن. مۇنىسى ەرلىك ەندى. مەن قوناەۆ بەرگەن پاتەردە 1980 جىلدان 1987 جىلعا دەيىن بەيسەكەڭنىڭ بالاسى بولىپ بىرگە تۇردىم. ول كوزىنىڭ تىرىسىندە ديماش احمەت ۇلىنا حات جازىپ, «مەنىڭ شاكىرتىم, بالام قۇلبەك ەرگوبەككە وسى پاتەردى بەرۋىڭىزدى سۇرايمىن, ءوز بالالارىمنىڭ دا ءوتىنىشى وسى» دەگەن بولاتىن. ول حات مەندە تۇر», – دەدى جازۋشى-عالىم.

قۇلبەك ەرگوبەكتىڭ ايتۋىنشا, وزىنە مۇرا-امانات بولىپ قالعان پاتەردى بەيسەمباي كەنجەباەۆتىڭ مۋزەيىنە اينالدىرۋ جوسپاردا بار.