Qulbek Ergóbek Qonaevtyń páteri ózine qalaı mura bolyp qalǵanyn aıtty

Foto: massaget.kz 

Qulbek Ergóbek Qonaevtyń páteri ózine qalaı mura bolyp qalǵanyn aıtty, dep jazdy qandastar.kz

Jazýshy, ádebıet synshysy, Memlekettik syılyqtyń ıegeri Qulbek Ergóbek Adal Adal youtube arnasyna bergen suhbatynda memleket qaıratkeri Dinmuhamed Qonaev ǵalym Beısembaı Kenjebaevqa óziniń páterin bergenin aıtty.

«Qonaev 1961 jyly ózi kireıin dep turǵan páterdi Beısembaı Kenjebaevqa syılaıdy. Ol bylaı bolǵan. Beısekeń Dımekeńe kirip jaǵdaıyn aıtqanda «sizden uıat boldy-aý» depti Qonaev. «Maǵan páter berileıin dep jatyr, Basaryqtyń tómengi jaǵynan (qazirgi Tólebaev-Qabanbaı batyr kósheleriniń qıylysy). Sony siz alyńyz» dep tórt bólmeli páterdi bergen. Sosyn Dımekeń Beısekeńe qýdalanyp júrgenine qaramastan Lenın ordenin ápergen. Munysy erlik endi. Men Qonaev bergen páterde 1980 jyldan 1987 jylǵa deıin Beısekeńniń balasy bolyp birge turdym. Ol kóziniń tirisinde Dımash Ahmetulyna hat jazyp, «meniń shákirtim, balam Qulbek Ergóbekke osy páterdi berýińizdi suraımyn, óz balalarymnyń da ótinishi osy» degen bolatyn. Ol hat mende tur», – dedi jazýshy-ǵalym.

Qulbek Ergóbektiń aıtýynsha, ózine mura-amanat bolyp qalǵan páterdi Beısembaı Kenjebaevtyń mýzeıine aınaldyrý josparda bar.