«كۇلەتىن جاعداي ەمەس»: باۋىرجان يساەۆ حالىققا رەنىشىن ءبىلدىردى

بەلگىلى ءانشى باۋىرجان يساەۆ «كەشREC» باعدارلماسىندا شىعارماشىلىعىنا قاتىستى جاڭالىقتارىن ءبولىستى, دەپ حابارلادى qandastar.kz سايتى. 

ونەر يەسى كونتسەرتەرىنە از ادام كەلگەن ساتتەرىن ەسكە الىپ, كوپ انشىلەردىڭ قازىرگى ماسەلەسىن قوزعادى.

«2015 جىلى 9 ادامعا كونتسەرت قويعانمىن. بۇل – كۇلەتىن جاعداي ەمەس. ول كەزدە كاسىبي ساحنادا جۇرگەنىمە 19 جىل بولعان. جالپى ونەر ادامىنا زال تولماسا, اسىرەسە 7-8 ادام عانا بولسا وتە اۋىر. بىراق سوعان قاراماي 1,5 ساعاتتىق كونتسەرت وتكىزدىم.

ال بىلتىر الماتى وبلىسىنا بارعاندا كەشىمە 4 ادام كەلگەن. وندا 1 ساعات وتكىزدىك. ودان بولەك 2-3 اۋدانعا بارعاندا 15-20 ادامنان كەلدى. وسى جاعدايدان كەيىن «ءبىزدىڭ ءداۋىرىمىز ءوتتى مە?» نەمەسە «ءبىزدىڭ اندەرىمىز كەرەك بولماي قالعان با?!» دەپ قاتتى ويلانىپ قالدىم. بۇل – كوپ انشىلەردىڭ ماسەلەسى.  كەي انشىلەر اۋدان ورتالىقتارىنا, اۋىلدارعا دەيىن بارادى جانە جارناماسىن جاسايدى, بيلەتتەرىن كاسساعا قالدىرادى. بىراق حالىق كونتسەرتكە كەلمەيدى. نەگە ەكەنىن تۇسىنبەي قويدىم.

ءتىپتى حالىق ءارتىسى اپا-اعالارىمىزدىڭ دا كونتسەرتىنە تىڭدارماندار كەلە بەرمەيتىنىن ەستىپ جاتامىن . سوسىن حالىق «مىنا ءانشى كورىنبەي كەتتى. اناۋ ءانشى جوق بولىپ كەتتى. قايدا ءجۇر ەكەن?!» دەپ ىزدەپ جاتادى», — دەدى ول.

سونىمەن قاتار ءانشى ونەردەگى مانسابىن اياقتاۋى مۇمكىن ەكەنىن ءمالىم ەتتى.

«كەيدە 1-2 جىلدا ونەردى قوياتىن شىعارمىن دەگەن وي كەلەدى. بىراق بيىل كاسىبي ساحنادا جۇرگەنىمە 29 جىل بولدى. كەلەسى جىلى شىعارماشىلىعاما 30 جىل تولۋىنا وراي مەرەكەلىك كونتسەرت وتكىزۋ كەرەك. سودان كەيىن ناقتى شەشىم قابىلداۋىم مۇمكىن», — دەدى ءانشى.