كۇنى-ءتۇنى جۇمىس ىستەدى: ۋسپەن اۋدانىنىڭ تۇرعىندارى سۋ تاسقىنىنا قارسى شارالار جايلى ايتىپ بەردى

وبلىستىق توتەنشە جاعدايلار باسقارماسى مەن جەرگىلىكتى اتقارۋشى ورگانداردان جالپى 30-دان استام تەحنيكا جىبەرىلىپ, 100-دەن استام ادام جۇمىلدىرىلدى

ۋسپەن اۋدانى اكىمىنىڭ ورىنباسارى تالعات بەشەنباەۆتىڭ ايتۋىنشا,  اۋداندا سۋ تاسقىنىنا قارسى جۇمىستار جۇرگىزىلۋدە.

– ەرىگەن قار سۋىنىڭ سالدارىنان زارداپ شەككەن 41 وتباسى بولعان. ولاردىڭ ىشىندە كەيبىر ۇيلەرگە سۋ كوبىرەك كىرسە, كەيبىر وتباسىلاردىڭ قوراسىنا عانا, ۇيلەردىڭ قاسىندا ورنالاسقان عيماراتتارعا كىرگەن. وبلىس اكىمىنىڭ قولداۋىمەن بارلىق زارداپ شەككەن وتباسىلارعا بيۋدجەتتىك ەمەس ۇيىممەن, سونداي-اق جەرگىلىكتى اتقارۋشى ورگاندارى بيۋدجەتىنەن قارجىلاي كومەك كورسەتىلدى. ەشبىر وتباسى سىرتتا قالعان جوق, جاعداي تولىعىمەن باقىلاۋدا, – دەيدى تالعات بەشەنباەۆ.

سۋ تاسقىنىنان زارداپ شەككەن تۇرعىنداردىڭ ءبىرى نادەجدا فومەنكونىڭ بۇل جەردە تۇرىپ جاتقانىنا 40 جىل بولعان.

– مۇنداي جاعداي بولادى دەپ كۇتپەگەن ەدىك. سەبەبى, قار از جاۋعان ەدى.  تاس جولىنان سۋ كەلە باستاعاندا قاتتى شوشىپ كەتتىك.  تاۋلىك بويى ەسىكتى اشپاي وتىردىق, سۋ تابالدىرىقتان جوعارى كوتەرىلدى. جەرتولە مەن اس ءۇيدىڭ ءىشى سۋعا تولدى, – دەيدى ول.

زەينەتكەردىڭ ايتۋىنشا, ارنايى كوميسسيا قۇرىلىپ, تۇرعىندار مەن ەرىكتىلەر كۇنى-ءتۇنى جۇمىس ىستەگەن.

– مەملەكەت تاراپىنان كومەك كورسەتىلىپ جاتقانىنا ريزاشىلىعىمىزدى بىلدىرەمىز. اقشا جەتكەنشە ىستەيمىز, قالعانىن ءوز كۇشىمىزبەن قالىپقا كەلتىرەمىز.  ءبىزدىڭ ەدەننىڭ استىندا عانا سۋ كوتەرىلدى. قالعاندارىنىڭ جاعدايى ودان دا قيىن بولدى, –  دەيدى نادەجدا فومەنكو.

ازيما ارىنوۆا «ديپلوممەن – اۋىلعا» باعدارلاماسى بويىنشا جۇمىس ىستەۋگە كەلىپ, باسپانا ساتىپ العان.  ول بولىنگەن قاراجاتتىڭ جوندەۋ جۇمىستارىنا جەتە مە  ەكەنىن ماماندار ەسەپتەيتىنىن ايتادى.

– ءۇيىمىزدىڭ نەسيەسى ءالى تولىق وتەلمەگەن. ءوتىنىش جازعاننان كەيىن وبلىستىق بيۋدجەتتەن كەلەسى كۇنى لەزدە قاراجات ءتۇستى.  جوندەۋ جۇمىستارىن ءوز كۇشىمىزبەن جۇرگىزەمىز. مۇنداي اپات بولادى دەپ كىم ويلاعان? دەگەنمەن, بارىنشا جەدەل جۇمىستار اتقارىلىپ جاتقانىنا ريزامىز, – دەيدى اۋىل تۇرعىنى. 

قر پرەزيدەنتى قاسىم-جومارت توقاەۆتىڭ تاپسىرماسىنا سايكەس پاۆلودار وبلىسىندا سۋ تاسقىنىنان زارداپ شەككەن وتباسىلاردىڭ ماتەريالدىق شىعىندارى تولىقتاي وتەلدى. وبلىس بويىنشا قۇرىلعان ارنايى كوميسسيا شەشىمىمەن بارلىعى 125 وتباسىعا ءتۇرلى دەڭگەيدە شىعىن ەسەپتەلدى. بۇگىنگى تاڭدا 120 وتباسىعا 97 ملن تەڭگە كولەمىندە وتەماقى بەرىلدى. قالپىنا كەلتىرۋگە جارامايتىن اقتوعاي اۋدانى جالاۋلى اۋىلىنداعى بەس ءۇي جاڭادان سالىنادى.

ارنايى كوميسسيا ءساۋىر ايىنىڭ سوڭىنا دەيىن ءوز جۇمىسىن جالعاستىرادى.