Kúnine 40 myń tg tapqan: Múgedek er men áıeldi 8 jyl boıy qaıyr suraýǵa májbúrlegender týraly sumdyq aqparat shyqty

Qaraǵandyda múgedek er men áıeldi 8 jyl boıy qaıyr suraýǵa májbúrlegen, dep habarlaıdy Qandastar.kz aqparattyq portaly Azattyq Rýhy. saıtyna siltep.

1984 jyly týǵan B. esimdi adam 2015 jyly Qaraǵandy q. «ÝM» saýda úıiniń mańaıynda qaıyr surap turǵan L. men M.-ny kórip, olarmen tanysqan. Qaskóı L.-nyń qol-aıaǵy joǵyn paıdalanyp, M. ekeýin qorqytyp, ózine jumys istetýdi bastaıdy.

Olardyń tabysyn tartyp alyp, óz qajettiligine jumsaıdy. 2020 jyly B. er men áıeldi Aqtas kentinde páterge ornalastyrady. Kóp ýaqyt ótpeı olardyń balasy dúnıege keledi. Sol kezde B. sábıdi tartyp alyp, ápkesine asyraýǵa berip, ata-ana quqyǵynan aıyramyn dep qoqan-loqy kórsetý arqyly jábirlenýshilerdi baqylaýda ustaǵan. 2023 jyly polıııa qyzmetkerlerimen B.-ny basqa qylmys boıynsha kúdikti retinde ustaıdy. B. tergeý ızolıatorynda otyrǵanyna qaramastan, qylmystyq áreketin jalǵastyryp, týystary men tanystaryn: V., G. jáne H.-ny tartyp, uıymdasqan qylmystyq top qurǵan.

Bul top jábirlenýshilerdi qaıtadan qaıyr suratýǵa májbúrlegen. Jınalǵan aqsha V-nyń avtokóliginiń aı saıynǵy nesıesin tóleýge, uıymdasqan qylmystyq toptyń jáne B-nyń ártúrli qajettilikterine jumsalǵan.

«Olar 2015 jyldyń qańtarynan bastap 09.12.2023 j. aralyǵynda B-ǵa kúnine 20000-nan 40 000 teńgege deıin berip otyrǵan», — dep habarlaıdy sot.

Qylmystyq toptyń músheleri qalaı jazalandy

Sot otyrysynda jábirlenýshilerdiń, kýálardyń aıǵaqtary men saraptama qorytyndylary arqyly sottalýshylardyń kinási tolyq dáleldendi. Prokýror B.-ǵa 20 jyl, ózgelerine 17 jyldan berý týraly jazalaý sharasyn suraǵan.

Sot sheshimimen:

• B. – 17 jylǵa,
• V., G. jáne H. – árqaısysy 12 jylǵa bas bostandyǵynan aıyryldy.

Jaza taǵaıyndaý kezinde B.-nyń qylmysty qaıtalap jasaýy aýyrlatatyn mán-jaı dep tanyldy. Al ózgelerge qatysty jas balalarynyń bolýy – jeńildetetin faktor retinde eskerildi.

Sonymen qatar sot jábirlenýshilerge moraldyq ótemaqy óndirý týraly talaptardy ishinara qanaǵattandyrdy. Atap aıtqanda, B. – 3 mln teńge, G. men H. – árqaısysy 2 mln teńge, al V. – 1 mln teńge tóleýge mindetteldi.

Úkim zańdy kúshine engen joq.