كۇنكورىس قيىن: الماتىدا زەينەتكەر “قۇل بازاردا” كۇنەلتىپ ءجۇر

فوتو: اليحان ساريەۆ

جاقىندا عانا الەۋمەتتىك جەلىدە اۋلا سىپىرىپ جۇرگەن اجەنىڭ بەينەجازباسى كەڭىنەن تارالدى. «اجەمىز ارەڭ جۇرسە دە, جۇمىس ىستەپ ءجۇر. جاسى 80-گە تاياپ قالعان بولار» دەگەن اۆتوردىڭ جازباسىنان كەيىن بەينەجازبا ەل ىشىندە قىزۋ تالقىعا ءتۇستى. كەيىپكەردى تاۋىپ, اجەيدىڭ قارتايعان شاعىندا جۇمىس ىستەۋىنىڭ سەبەبىن بىلگەن tengrinewskz سايتىنىڭ ماتەريالىن جاريالادىق. 

اجەمىزدىڭ ەسىمى – ايساۋلە بايقۋاتوۆا, جاسى – 65-تە. الەۋمەتتىك جەلىدە اجە ءوزىنىڭ جۇلدىزعا اينالعانىن بىلمەك تۇگىلى, وزگەلەردىڭ ونى ءتۇسىرىپ العانى جايىندا حابارسىز.

«بۇكىل ءومىرىم وسىلاي قارا جۇمىستا ءوتتى»

ايساۋلە اپا الماتى وبلىسىنا قاراستى شامالعان ستانساسىندا ۇلىمەن بىرگە تۇرادى. ۇلى ۇيلەنگەن, ەرلى-زايىپتىنىڭ 5 بالاسى بار. ەڭ ۇلكەنى – 14 جاستا, ال كىشىسى ەكى جاستا.

زەينەتكەردىڭ ايتۋىنشا, ول قاراقالپاقستاننان كوشىپ كەلگەن. سول جاقتا تۋىپ-وسكەن ول ءومىرىنىڭ كوبىن ءوز ەلىندە وتكىزىپتى. قازاقستانعا ۇلىنىڭ قولىنا كوشىپ كەلگەن. ونىڭ ەسىمى – قورالبەك الدانازاروۆ.

« ۇلىم عانا ەمەس, قىزىم دا وسى قازاقستاندا, بىراق ول استانادا تۇرادى. تاعى ءبىر قىزىم ەلدە قالىپ قالدى», – دەيدى اجە.

ايساۋلە اپا قاجەتتىلىكتەن قارتايعان شاعىندا جۇمىسقا شىققان ەكەن. ويتكەنى ۇلى قورالبەك ءۇي تۇرعىزۋ ءۇشىن نەسيە العان. ال ونىڭ ءبىر ايلىعى اۋلەتتىڭ كۇنكورىسىنە دە جەتپەيدى. ول دا اناسىنىڭ جۇمىس ىستەمەي ۇيدە وتىرعانىن قالايدى. بىراق زەينەتكەر جۇمىسقا شىقپاسا كۇنەلتۋ مۇلدەم قيىنداپ كەتەتىنىن مويىندادى.

– كوز اشقالى تىنىم تاپپاي, ەڭبەك ەتىپ كەلەمىن. كۇيەۋىم دۇنيەدەن ەرتە كەتتى, بالالارىمدى اسىراۋ كەرەك بولدى. جاستايىمنان ەگىستىكتە جۇمىس ىستەپ, كەيىن تەمىرجول زاۋىتىندا, قۇرىلىستا دا ءجۇردىم. بۇكىل ءومىرىم وسىلاي قارا جۇمىستا ءوتتى. 2017 جىلى ۇلىم ناپاقاسىن تابۋ ءۇشىن قازاقستانعا كەتتى. ەكى جىلدان كەيىن ءبىز كوشىپ بارىپ, وسىندا قونىستاندىق, – دەدى ايساۋلە اپا.

قورالبەكتىڭ ءوزى ستانتسيادا جۇمىس ىستەيدى, ونىڭ جالاقىسى  – 250 مىڭ تەڭگە.  ال, اي سايىنعى نەسيە تولەمى – 126 مىڭ تەڭگە. ونىڭ ۇستىنە كەلىنشەگى جۇمىس ىستەمەيدى, ۇيدە بالالاردى قارايدى. ايساۋلە اپانىڭ الاتىن زەينەتاقىسى – 66 مىڭ تەڭگە. ۇلىنىڭ ءبىر جاعىنا شىعىسىپ, كومەكتەسپەك بولعان قارت انا جۇمىسقا شىققان.

«قۇل بازارىنا» ايساۋلە اپا تاڭعى 5-تەن جينالادى 

– ستانساداعى دۇكەننىڭ جانىندا جالدامالى جۇمىسشىلار تۇراتىن جەر, ياعني «پياتاك»-قا باردىم. سول جەردە بوتا جانە تۇرسىناي دەگەن بريگادا باسشىلارى مەنىڭ جۇمىسقا تۇرۋىما كومەكتەستى. مەنى ەشكىم قيناپ, ماجبۇرلەگەن ەمەس, «قۇل بازارىنا» جۇمىس ىستەۋگە ءوزىم كەلدىم. اراسىندا دەمالعانىم بولماسا, جۇمىسقا كۇندە شىعامىن. مەنى كوبىنە جەڭىلدەۋ ورىنعا قويعاندىقتان, جۇمىس اسا اۋىر ەمەس, – دەيدى ول.

وسى جۇمىسقا جەتۋ ءۇشىن زەينەتكەر تاڭمەن تالاسا تۇرادى ەكەن.

«ۇيدەن تاڭعى 5:30-دا شىعامىن, 6:20-دا كولىككە وتىرامىن. نەگىزى بريگادا باسشىلارىنىڭ جەكە كولىگى بار, «پياتاك»-قا بارعانىمدا كۇندە مەنى سول جەردەن اكەتىپ, جۇمىسقا جەتكىزىپ سالادى. سودان 16:30-دا جينالىپ, 17:00-دە ۇيگە قايتامىز», – دەدى ايساۋلە اپا.

ونىڭ ايتۋىنشا, بۇل جەردە اي سايىن الىپ وتىراتىن تۇراقتى جالاقى جوق. شتاتتىق قىزمەتكەر بولماعان سوڭ ەڭبەكاقىسى كۇنبە كۇن, ىستەگەن جۇمىسىنا قاراي تولەنەدى.

«بەرگەنىن الامىن. ول جەردەگى قىز-كەلىنشەكتەر دە قولىنداعى بارىمەن ءبولىسىپ, كومەكتەسەدى. شىنى كەرەك, كەيدە ۇيدە نان دا بولماي قالادى. سونداي كەزدە قالادان 5-6 بولكە نان اكەلەمىن», – دەيدى زەينەتكەر.

زەينەتكەر تۇرمىستىق جاعدايى تۇزەلمەيىنشە «قۇل بازارىندا» جۇرە بەرمەك

ايساۋلە اپانىڭ ەكى نەمەرەسى وقۋشى, بيىل تاعى بىرەۋى مەكتەپكە بارادى.

«جاقىن جەردە مەكتەپ جوق. بىزدەن 15-20 شاقىرىم جەردە, ەكپىندىدە مەكتەپ بار. بىراق وعان بالالاردى جەتكىزۋ قيىن. ارينە, ەكى ارادا اۆتوبۋس جۇرەدى. الايدا ءبىر بالا ءۇشىن جول اقىسى – 6 مىڭ تەڭگە. ءاۋ باستا ءۇيدى مەكتەپكە جاقىن جەردەن الماق ەدىك, باعاسى ۇشىپ تۇردى. جەردىڭ ءوزى 2-3 ميلليون عوي», – دەيدى قورالبەك.

ولاردىڭ قازىر تۇرىپ جاتقان ۇيىندە تۇرمىسقا قولايلى ەشقانداي جاعداي جاسالماعان. اجەتحاناسى دالادا, گاز تارتىلماعان, ەدەننىڭ ءوزى قارا جەر, ەشقانداي تاقتاي توسەلمەگەن. جەر سىلكىنىسىنەن كەيىن ءۇيدىڭ قابىرعاسى جارىلىپ كەتكەن.

ايساۋلە اپا سوڭعى كەزدە دەنساۋلىعى سىر بەرىپ جۇرگەنىن مويىنداسا دا, ءومىردىڭ قيىندىعىنا شاعىمدانبايدى.

«قۇدايعا شۇكىر, مەندە ءبارى جاقسى. تەك ءبىر اياعىم ىستەمەي قالدى. وتكەندە قۇلاپ ءتۇستىم. قولىممەن بەتىمدى جاۋىپ ۇلگەردىم, بىراق اياعىمدى شىعارىپ الدىم «, – دەيدى ول.

سوعان قاراماستان زەينەتكەر جۇمىسىن توقتاتپادى. ءتىپتى, ءالى دەمالىسقا شىقپايتىنىن ايتتى. «جاعداي تۇزەلمەيىنشە ءالى ىستەي بەرەمىن. اللا قۋات بەرسىن!», – دەدى ايساۋلە اپا.