كۋرەر بولىپ كيىنگەن ەر ادام تانىسىنىڭ اقشاسىن ۇرلاپ كەتكەن

استانادا پوليتسەيلەر تانىسىنىڭ پاتەرىنەن 1,5 ملن تەڭگەنىڭ مۇلكىن ۇرلاعان تۇرعىندى ۇستادى, دەپ حابارلايدى Qandastar.kz

ەلوردادا پوليتسەيلەر ەكى تاۋلىكتىڭ ىشىندە پاتەر ۇرلىعىنا قاتىستى ءىستى اشتى. پوليتسياعا قالا تۇرعىنى شاعىمدانىپ, بەلگىسىز بىرەۋدىڭ ولاردىڭ پاتەرىنە زاڭسىز كىرىپ, اقشا مەن ءتورت التىن ساقينانى ۇرلاپ كەتكەنىن حابارلاعان. ونىڭ ايتۋىنشا, ۇرى ءۇي يەلەرىنىڭ جۇمىستا بولۋىن پايدالانىپ, كۇندىز قىلمىس جاساعان. قىلمىس ساتىندە كورشىلەر دە, كەزدەيسوق كۋاگەرلەر دە كۇدىكتى ادامنىڭ پاتەرگە كىرگەنىن بايقاماعان. جابىرلەنۋشى كەلتىرىلگەن جالپى زالالدى شامامەن ءبىر جارىم ميلليون تەڭگە دەپ باعالادى.

سارايشىك اۋداندىق كريمينالدىق پوليتسيا ءبولىمىنىڭ قىزمەتكەرلەرى جۇرگىزگەن جەدەل-ىزدەستىرۋ ءىس-شارالارىنىڭ ناتيجەسىندە كۇدىكتىنىڭ جەكە باسى انىقتالدى. ول – جابىرلەنۋشىلەردىڭ 38 جاستاعى تانىسى بولىپ شىقتى. تەرگەۋ بارىسىندا ەر ادامنىڭ الدىن الا دايىندالعانى بەلگىلى بولدى: ول كۋرەر رەتىندە كەلىپ, ۇيدە ەشكىم جوق ەكەنىنە كوز جەتكىزىپ, كىلتتىڭ كوشىرمەسىن جاساپ العان. كەيىن سونىڭ كومەگىمەن پاتەرگە كىرىپ, ۇرلىق جاساعان.

قازىرگى تاڭدا اتالعان دەرەك بويىنشا قىلمىستىق ءىس قوزعالدى. تەرگەۋ ناتيجەسىندە ۇرلانعان اقشا كۇدىكتى تاراپىنان جەكە قاجەتتىلىكتەرىنە جۇمسالعانى انىقتالدى, ال التىن اشەكەيلەر تاركىلەنىپ, زاتتاي ايعاق رەتىندە الىندى.