قىمبات دوسجان جانىبەك ساۆەلەۆكە قاتىستى جاعىمدى جاڭالىعىن ايتتى

بەلگىلى جۋرناليست قىمبات دوسجان بەلگيالىق وتباسى اسىراپ العان جانىبەك ەسىمىمەن تانىمال مۇرات ساۆەليەۆكە قاتىستى تىڭ مالىمەت جاريالادى, دەپ حابارلايدى Qandastar.kz Azattyq Rýhy-نا سىلتەمە جاساپ.

جۋرناليست ءسوز باسىندا تىڭ مالىمەت بولماعاندىقتان بۇگىنگە دەيىن ەشنارسە جاريالاماعانىن قوزعاپ ءوتتى.

«ەستەرىڭىزدە بولسا, 2024 جىلعى 31 قاڭتاردا قر قىلمىستىق كودەكسىنىڭ 135-بابى, 3-بولىگى (كامەلەتكە تولماعاندار ساۋداسى, ونىڭ ىشىندە: كامەلەتكە تولماعان ادامدى قازاقستان رەسپۋبليكاسىنىڭ شەگىنەن تىسقارى جەرگە اكەتۋ) بويىنشا ارقالىق قالاسىنىڭ پوليتسيا باسقارماسى قىلمىستىق ءىس قوزعاعان ەدى, بىراق, ءىس ءالى سوتقا جەتكەن جوق.

2025 جىلعى 9 ماۋسىمدا قابىلدانعان قاۋلىدان بىلگەنىمىز: قىلمىستىق ءىس بويىنشا كوپتەگەن ازاماتتان قان ۇلگىلەرى الىنىپ, جانىبەكتىكىمەن سالىستىرىلىپ, ساراپتاما تاعايىندالعان. وسى ىسكە قاتىسى بولۋى مۇمكىن ازاماتتاردان جاۋاپ الىنعان, بىراق, جانىبەك ءۇشىن 12 مىڭ دوللار الدى دەگەن كۇدىككە ىلىنگەن ادام كۇدىكتى ەمەس, قورعالۋعا قۇقىعى بار كۋا رەتىندە قاراستىرىلعان ەكەن.

پەرزەنتحانا مەن بالالار ءۇيىنىڭ باسشىلىعى جۇمىس بارىسىندا جىبەرگەن سالعىرتتىققا قاتىستى زاڭ الدىندا جاۋاپ بەرۋى كەرەك دەپ ويلايمىن جانە جانىبەكتىڭ اكەسى بولۋى مۇمكىن دەگەن ادامنىڭ ۇلىنان قان الىپ, دنق ءاناليزىن جاساۋ كەرەك», — دەدى قىمبات دوسجان.

ءسوزىن جالعاي وتىرىپ, جانىبەكتىڭ ءىسىن مارقۇم شەرزات ءىسى بويىنشا زاڭگەر بولعان مەيىرمان شەكەەۆ العانىن قوزعاپ ءوتتى.

«ەندى نەگىزگى جاڭالىعىمىز – مەن جانىبەكتىڭ رەسمي وكىلى رەتىندە حالىق زاڭگەرى – مەيىرمان قالماحان ۇلىنىڭ كومەگىنە جۇگىندىم. جالعىز ءوزىم كۇرەسىپ, قينالىپ كەتكەنىم راس, ويتكەنى, جابىرلەنۋشىنىڭ رەسمي وكىلى رەتىندە iس بويىنشا بەلگiلi ءمان-جايلار تۋرالى مالiمەتتەردi جاريالاماۋعا مىندەتتىمىن.

ەندىگى ۋاقىتتا ءبىلىمدى, بىلىكتى زاڭگەرمەن بىرلەسىپ, كۇرمەۋى قيىن بۇل وقيعانىڭ شەشىمىن تابامىز دەپ سەنەمىن. ءبىز ءادىل شەشىم قابىلدانعانىن تالاپ ەتەمىز. اتالعان ىسكە قاتىستى رەسمي ءارى ناقتى مالىمەتتى مەنىڭ, جانىبەكتىڭ جانە مەيىرمان قالماحان ۇلىنىڭ عانا پاراقشاسىنان ءبىلىپ وتىراسىزدار.

ەلدەگى عانا ەمەس, شەتەلدەگى قازاقتارعا دا جاناشىر بولىپ جۇرگەن حالىق زاڭگەرىنىڭ ۇسىنىسىمدى قولداعانىنا العىسىم شەكسىز جانە الداعى جۇمىسىنا ساتتىلىك تىلەيمىن!» — دەدى جۋرناليست قىمبات دوسجان.