جاڭالىقتار
قىتاي رەسەي گازىن قازاقستان ارقىلى تاسىمالداۋدى تىم قىمبات دەپ سانايدى
فوتو: depositphotos/63ru78
قىتاي رەسەي گازىن قازاقستان ارقىلى تاسىمالداۋدى تىم قىمبات دەپ سانايدى, دەپ جازدى qandastar.kz
بۇل تۋرالى قىتايدىڭ رەسەيدەگى ەلشىسى چجان حانحۋەي ەۋرازيالىق مۇناي-گاز فورۋمىنىڭ كۋلۋارىندا جۋرناليستەرگە مالىمدەدى.
«رەسەيدەن قازاقستان ارقىلى گاز جەتكىزۋ مۇمكىن ەمەس, ويتكەنى ول باعىتتا تەك ءبىر عانا گاز قۇبىرى بار, ول قازىردىڭ وزىندە تولىق جۇكتەلگەن. ەگەر وسى مارشرۋتپەن رەسەيلىك گازدى جەتكىزسەك, جاڭا قۇبىر سالۋعا تۋرا كەلەدى, بۇل وتە قىمبات. رەسەيلىك تاراپ ماسەلەنى زەرتتەپ جاتىر, بىراق بۇل شىن مانىندە مۇمكىن ەمەس», — دەدى ەلشى.
ونىڭ پىكىرىنشە, ەكى ەل ءۇشىن باعاسى بويىنشا كەلىسۋ وڭاي بولاتىن «ءسىبىر كۇشى – 2» جوباسىنا نازار اۋدارعان ءجون. چجان حانحۋەيدىڭ ايتۋىنشا, جوبا بويىنشا كەلىسىمگە قول جەتكىزىلگەن. قازىر گاز قۇبىرى موڭعوليا اۋماعىمەن وتە مە, الدە رەسەي شەكاراسىندا قالا ما — وسى ماسەلە قارالۋدا. 2024 جىلدىڭ سوڭىندا رەسەي ۆيتسە-پرەمەرى الەكساندر نوۆاك رەسەيدەن قىتايعا قازاقستان ارقىلى گاز قۇبىرىن سالۋ جوباسى ازىرلەنىپ جاتقانىن حابارلاعان بولاتىن. ونىڭ قۋاتى جىلىنا 45 ملرد تەكشە مەتردى قۇرايدى, ونىڭ 10 ملرد تەكشە مەترى قازاقستاننىڭ گازداندىرىلۋىنا جۇمسالادى. ال «ءسىبىر كۇشى – 2» گاز قۇبىرى يامال مەن باتىس ءسىبىر اۋماعىنان قىتايعا تارتىلۋى ءتيىس. جوبانىڭ جوسپارلى قۋاتى — جىلىنا 50 ملرد تەكشە مەتر.
