ءبىلىم
قىزىلوردادا 16 جاستاعى سىنىپتاسىن جوزەكشەلىكپەن اينالىسۋعا ماجبۇرلەگەن ءۇش كۇدىكتى قاماۋعا الىندى
فوتو: اشىق دەرەككوز
قىزىلوردادا 16 جاستاعى وقۋشىنى قۇلدىقتا ۇستاعان سىنىپتاستارى ۇستالىپ, قاماۋعا الىندى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.
وبلىستىق سوتتىڭ مالىمەتىنشە, قىلمىستىق كودەكستىڭ 134-بابى 3-بولىگى 1-تارماعى بويىنشا كامەلەتكە تولماعان كۇدىكتىلەر ق, ا جانە م-گە قاتىستى «كۇزەتپەن ۇستاۋ» تۇرىندەگى بۇلتارتپاۋ شاراسىن سانكتسيالاۋ تۋرالى تەرگەۋشىنىڭ ءوتىنىشحاتى قىزىلوردا قالاسىنىڭ مامانداندىرىلعان تەرگەۋ سوتىنا ءتۇستى. سوت تەرگەۋشىنىڭ ءوتىنىشحاتىن قاناعاتتاندىرماي, كامەلەتكە تولماعان كۇدىكتىلەرگە 2 اي مەرزىمگە ء«ۇي قاماق» تۇرىندەگى بۇلتارتپاۋ شاراسىن تاعايىندادى. قىلمىستىق پروتسەسستىڭ كودەكستىڭ 147-بابى 2- بولىگى 1,5 تارماقتارى بويىنشا ولارعا شەكتەۋلەر قولدانىلدى.
قىزىلوردا وبلىستىق سوتىنىڭ قىلمىستىق ىستەر جونىندەگى سوت القاسى سوت اكتىلەرىنە جابىرلەنۋشىنىڭ وكىلىنەن كەلىپ تۇسكەن شاعىمداردى قاراپ, كۇدىكتىلەردىڭ جاساعان ارەكەتتەرىنىڭ اۋىرلىق دارەجەسىن, كۇدىكتىلەردى سوت ءىسىن جۇرگىزۋگە كەدەرگى جاسايدى نەمەسە تەرگەۋدەن جانە سوتتان جاسىرىنادى دەپ پايىمداۋعا جەتكىلىكتى نەگىزدەر بارىن ەسكەرىپ, شاعىمدى قاناعاتتاندىردى.
“تەرگەۋ سوتىنىڭ قاۋلىلارىن وزگەرتىپ, كۇدىكتىلەرگە 2 اي مەرزىمگە «كۇزەتپەن ۇستاۋ» تۇرىندەگى بۇلتارتپاۋ شاراسىن قولدانۋ تۋرالى قاۋلى شىعاردى”, – دەپ مالىمدەدى قىزىلوردا وبلىسى سوتىنىڭ ءباسپاسوز قىزمەتى.
ەسكە سالساق, بۇعان دەيىن قىزىلوردادا 16 جاستاعى قىزدى سىنىپتاستارى جەزوكشەلىكپەن اينالىسۋعا ماجبۇرلەدى دەگەن كۇدىككە ىلىنگەنى تۋرالى جازعان ەدىك. جابىرلەنۋشىنىڭ اناسى بارلىعى قىزى 10 سىنىپتا سىنىپتاس قۇربىسىمەن جاقىن ارالاسا باستاعان كەزدە باستالعانىن ايتادى.
