قىزىلوردادا وقۋشىنى جەزوكشەلىككە ماجبۇرلەۋ: قىلمىستىق ىسكە قاتىستى 13 ادام انىقتالدى

قىزىلوردادا 16 جاسار وقۋشىنى سىنىپتاستارى جەزوكشەلىككە ماجبۇرلەۋ تۋرالى قىلمىستىق ىسكە قاتىستى قر ىشكى ىستەر ءمينيسترىنىڭ ورىنباسارى يگور لەپەحا جاڭا دەرەكتەر جاريالادى, دەپ حابارلادى Qandastar.kz.

«ءىس بويىنشا بۇگىنگە دەيىن 13 ادام انىقتالدى, ونىڭ ىشىندە 11-ءى قاماۋدا, ال ەكەۋى ءۇي قاماقتا. ولارعا بىرقاتار باپ بويىنشا قىلمىستىق ىستەر قوزعالدى. 13 ادامنىڭ اراسىندا قىزدى ماجبۇرلەگەندەر دە, ۇيىمداستىرعاندار دا بار. بۇل ءىس بويىنشا باسقا دەرەكتەردى جاريالاي المايمىن, سەبەبى ونىڭ ءمان-جايى تەرگەۋشىلەردىڭ قۇزىرەتىندە», – دەپ ي.لەپەحا سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەردى.

سونداي-اق, جابىرلەنۋشى قىزعا قاتىستى زاڭسىز ارەكەت جاساعانداردىڭ بارلىعى تەكسەرىلۋدە. بۇعان دەيىن تامىز ايىنىڭ سوڭىندا 8 كۇدىكتى قامالعانى بەلگىلى بولعان.

وقۋشى قىزدىڭ اتا-اناسى جاعدايدى قوعامدىق قورعا جۇگىنگەن. ناتيجەسىندە قىزىلوردا پوليتسياسى اتالعان دەرەك بويىنشا كۇدىكتىلەردى ۇستاپ, ۋاقىتشا ۇستاۋ يزولياتورىنا قامادى. كەيىن كۇدىككە ىلىنگەن مەكتەپ وقۋشىلارى ۇيقاماققا اۋىستىرىلدى.

وقيعاعا بايلانىستى №7 مەكتەپ-ليتسەي ديرەكتورى, تاربيە ءىسى جونىندەگى ورىنباسارى, پسيحولوگى, الەۋمەتتىك پەداگوگى, سىنىپ جەتەكشىلەرى قىزمەتىنەن بوساتىلدى.