جاڭالىقتار
قىزىلوردالىق كوپبالالى اكە مەكتەپتە جاراقات الىپ, مۇگەدەك بولىپ قالدى. ەندى ول وتەماقى الا الماي وتىر
فوتو: ۆيدەودان سكرين
قىزىلوردا وبلىسى, قارماقشى اۋدانىنداعى №121 مەكتەپتىڭ بۇرىنعى قىزمەتكەرى نۇرلان ەرعونتاەۆ اۋىر جۇمىس كەزىندە جاراقات الىپ, مۇگەدەك بولىپ قالعان, دەپ جازدى qandastar.kz
قازىر 52 جاستاعى ازامات بالداققا سۇيەنىپ جۇرەدى جانە جۇمىسقا جارامسىز.
بۇل تۋرالى Stan.kz اقپارات اگەنتتىگى ينفورمبيۋرو باعدارلاماسىنا سىلتەمە جاساپ حابارلايدى.
نۇرلان ەرعونتاەۆ مەكتەپتە 19 جىل تەحنيكالىق قىزمەتكەر بولىپ ىستەگەن. ونىڭ ايتۋىنشا, العاش رەت 7 جىل بۇرىن مەكتەپتىڭ دارەتحاناسىن جوندەۋ كەزىندە ۇستىنە قابىرعانىڭ كىرپىشى قۇلاپ كەتكەن. اۋىر جاراقات العانىنا قاراماستان, وتباسىن اسىراۋ ءۇشىن قايتا جۇمىسقا شىققان. الايدا بىلتىر مەكتەپتىڭ جىلۋ قازاندىعىندا تاعى جاراقات الىپ, سودان بەرى جۇمىسقا جارامسىز بولىپ قالعان.
نۇرلان ەرعونتاەۆتىڭ جۇبايى اينۇر توقسانباەۆا سول مەكتەپتىڭ ەدەن جۋشىسى. ايەلىنىڭ سوزىنشە, كۇيەۋى 8 بالانى اسىراپ وتىرعانىن جانە جولداسىنىڭ دەنساۋلىعى ناشارلاپ كەتكەنىن ايتىپ, ءتيىستى 40% وتەماقىنى تالاپ ەتىپ ءجۇر.
ەڭبەك ينسپەكتسياسى ەكى جاعدايدا دا مەكتەپ باسشىلىعىنىڭ كىناسى بار ەكەنىن انىقتاپ, جۇمىسشىنىڭ قاۋىپسىزدىگىنە جەتكىلىكتى ءمان بەرىلمەگەن دەگەن شەشىم شىعارعان. ياعني نۇرلان ەرعونتاەۆتىڭ جاراقاتى جۇمىس ورنىنداعى قاۋىپسىزدىك ەرەجەلەرىنىڭ ساقتالماۋى سالدارىنان بولعان.
الايدا مەكتەپ ديرەكتورى مۇحتار جۇماتاەۆ وتەماقى تۋرالى ناقتى شەشىم ءالى شىقپاعانىن, قۇجاتتاردى پروكۋراتۋرا قاراپ جاتقانىن ايتادى.
«بۇل جەردە 40% اقشا تولەنسىن دەگەن ءسوز جوق. تەك جۇمىسقا جارامسىز دەگەن ءسوز تۇر دەدىم. پروكۋراتۋرا زاڭدىلىعىن كورەتىن شىعار», – دەدى مەكتەپ ديرەكتورى.
قازىر بۇل وتباسى تەك اينۇر توقسانباەۆانىڭ تابىسىنا قاراپ وتىر. ەرلى-زايىپتىلار ادىلدىك ىزدەپ, سوتقا جۇگىنۋدى قاراستىرىپ وتىر.
ەسكە سالايىق, 21 جەلتوقساندا سەمەيدە قالالىق شىرشانى بەزەندىرۋ كەزىندە مۇعالىم قۋات ايتقالي بيىكتەن قۇلاپ, اۋىر جاراقات العان ەدى. وقيعادان كەيىن وقۋ-اعارتۋ ءمينيسترى عاني بەيسەمباەۆ جاعدايعا بايلانىستى پىكىر ءبىلدىرىپ, ۇستازداردى مىندەتىنە كىرمەيتىن قىزمەتكە جۇمساۋعا بولمايتىنىن ەسكەرتتى. 8 قاڭتار كۇنى وقۋ-اعارتۋ ءمينيسترى مۇعالىمنىڭ اۋرۋحانادان شىعارىلعانىن مالىمدەدى.
