Qyzylordalyq kópbalaly áke mektepte jaraqat alyp, múgedek bolyp qaldy. Endi ol ótemaqy ala almaı otyr

Foto: Vıdeodan skrın

Qyzylorda oblysy, Qarmaqshy aýdanyndaǵy №121 mekteptiń burynǵy qyzmetkeri Nurlan Erǵontaev aýyr jumys kezinde jaraqat alyp, múgedek bolyp qalǵan, dep jazdy qandastar.kz

Qazir 52 jastaǵy azamat baldaqqa súıenip júredi jáne jumysqa jaramsyz.

Bul týraly Stan.kz aqparat agenttigi Informbıýro baǵdarlamasyna silteme jasap habarlaıdy.

Nurlan Erǵontaev mektepte 19 jyl tehnıkalyq qyzmetker bolyp istegen.  Onyń aıtýynsha, alǵash ret 7 jyl buryn mekteptiń dárethanasyn jóndeý kezinde ústine qabyrǵanyń kirpishi qulap ketken. Aýyr jaraqat alǵanyna qaramastan, otbasyn asyraý úshin qaıta jumysqa shyqqan. Alaıda byltyr mekteptiń jylý qazandyǵynda taǵy jaraqat alyp, sodan beri jumysqa jaramsyz bolyp qalǵan.

Nurlan Erǵontaevtyń jubaıy Aınur Toqsanbaeva sol mekteptiń eden jýýshysy. Áıeliniń sózinshe, kúıeýi 8 balany asyrap otyrǵanyn jáne joldasynyń densaýlyǵy nasharlap ketkenin aıtyp, tıisti 40% ótemaqyny talap etip júr.

Eńbek ınspekııasy eki jaǵdaıda da mektep basshylyǵynyń kinási bar ekenin anyqtap, jumysshynyń qaýipsizdigine jetkilikti mán berilmegen degen sheshim shyǵarǵan. Iaǵnı Nurlan Erǵontaevtyń jaraqaty jumys ornyndaǵy qaýipsizdik erejeleriniń saqtalmaýy saldarynan bolǵan.

Alaıda mektep dırektory Muhtar Jumataev ótemaqy týraly naqty sheshim áli shyqpaǵanyn, qujattardy prokýratýra qarap jatqanyn aıtady.

«Bul jerde 40% aqsha tólensin degen sóz joq. Tek jumysqa jaramsyz degen sóz tur dedim. Prokýratýra zańdylyǵyn kóretin shyǵar», – dedi mektep dırektory.

Qazir bul otbasy tek Aınur Toqsanbaevanyń tabysyna qarap otyr. Erli-zaıyptylar ádildik izdep, sotqa júginýdi qarastyryp otyr.

Eske salaıyq, 21 jeltoqsanda Semeıde qalalyq shyrshany bezendirý kezinde muǵalim Qýat Aıtqalı bıikten qulap, aýyr jaraqat alǵan edi. Oqıǵadan keıin oqý-aǵartý mınıstri Ǵanı Beısembaev jaǵdaıǵa baılanysty pikir bildirip, ustazdardy mindetine kirmeıtin qyzmetke jumsaýǵa bolmaıtynyn eskertti. 8 qańtar kúni oqý-aǵartý mınıstri muǵalimniń aýrýhanadan shyǵarylǵanyn málimdedi.