جاڭالىقتار
لاۋازىمىن اسىرا پايدالانعان قتج شەنەۋنىگى سوتتالدى
فوتو: Istockphoto
بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ايتتى, دەپ جازادى qandastar.kz turkystan.kz-كە سىلتەمە جاساپ.
«استانا قالاسىنىڭ قىلمىستىق ىستەرى جونىندەگى مامانداندىرىلعان اۋدانارالىق سوتى «قازاقستان تەمىر جولى» ۇك» اق فيليالى – «اۆتوماتتاندىرۋ جانە تسيفرلاندىرۋ ديرەكتسياسى» ديرەكتورى س.امرينعا قاتىستى ۇكىم شىعاردى. ول ءوزىنىڭ جەكە تۇرعىن ءۇيىنىڭ قۇرىلىس جۇمىستارىمەن اينالىسىپ جۇرگەن تانىسىن جالعان ينجەنەر ەتىپ جۇمىسقا ورنالاستىرىپ, بيلىگىن اسىرا پايدالانىپ, زاڭسىز جالاقى تۇرىندە مەملەكەتكە 21 ميلليون تەڭگە زالال كەلتىرگەنى ءۇشىن كىنالى دەپ تانىلدى», – دەدى رەسمي وكىل.
ونىڭ دەرەگىنشە, وعان مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە لاۋازىمداردى اتقارۋ قۇقىعىنان ءومىر بويىنا ايىرا وتىرىپ, 4 جىل 8 ايعا باس بوستاندىعىنان ايىرۋ جازاسى تاعايىندالدى.
