لەگيونەرلەردەن باس تارتساق جاعداي قاۋىپتى – سامات سماقوۆ

فوتو: Sports.kz

ول لەگيونەرلەرسىز وتاندىق فۋتبول قۇلدىرايدى دەپ وتىر, دەپ جازادى qandastar.kz

قازىرگى ۋاقىتتا ەلىمىزدە لەگيونەرلەردى قارجىلاندىرۋدى توقتاتۋ ماسەلەسى زاڭ جوباسى اياسىندا شەشىلىپ جاتىر. ال قازاقستان فۋتبولىندا لەگيونەردىڭ كوپتىگى جايلى ايتۋدىڭ ءوزى ارتىق, ودان قالدى قپل-دا شەتەلدىك ويىنشىلارعا ليميت تە الىنىپ تاستالعان دەپ حابارلادى 1bol.kz.

ال زاڭ جوباسى قابىلدانسا, جاعداي قالاي وزگەرەدى? وسى ورايدا ارداگەر فۋتبولشى سامات سماقوۆتىڭ پىكىرىن ءبىلۋدى ءجون كوردىك.

«استانا» كلۋبىنىڭ تەحنيكالىق ديرەكتورى مۇنداي جاعدايدا كلۋبتار اراسىنداعى ايىرماشىلىق تىم ۇلعايىپ كەتەتىنىن ايتادى.

«لەگيونەرلەردى قارجىلاندىرۋ توقتاتىلسا, وندا بىزدە لەگيونەر قالمايدى دەگەن ءسوز. قپل-داعى ءوز ورىندارىن ساقتاپ قالۋعا كۇرەسىپ جاتقان كلۋبتارعا ەشكىم اقشا بەرمەيدى, ولاردا ونسىز دا دەمەۋشى جوق. العاشقى ورىندا تۇرعان كلۋبتار ءويتىپ-ءبۇيتىپ دەمەۋشى تابۋى مۇمكىن, ال باسقالارىنىڭ ءحالى مۇشكىل. ياعني دەڭگەي مۇلدە الشاقتاپ كەتەدى. ءوزىمىز دە سول دەڭگەيى جوعارى لەگيونەرلەرگە, اعا بۋىنعا قاراپ وستىك, ۇيرەندىك, جاستار دا ءدال سولاي», – دەيدى سماقوۆ.

سونىمەن قاتار ول لەگيونەرلەرسىز وتاندىق فۋتبول قۇلدىرايدى دەپ سانايدى. سامات مۇنداي زاڭ قابىلدانباس بۇرىن بۇل ماسەلەلەر جان-جاقتى تالقىلانۋى كەرەكتىگىن ايتادى. بىراق ۇلتتىق چەمپيوناتتا دەڭگەيى تومەن لەگيونەرلەردىڭ دە كوپتىگىن جوققى شىعارمادى.

«ءبىزدىڭ چەمپيوناتتىڭ دەڭگەيى ونسىز دا تومەن, لەگيونەرلەرسىز جاعداي ءتىپتى قيىنداپ كەتەدى. سوندىقتان بۇل جەردە ورتاق شەشىم قابىلدانۋى كەرەك دەپ ويلايمىن. مۇمكىن ليميت ەنگىزۋ كەرەك شىعار. باستىسى, ءوز ەلدەرىندە ەشكىمگە كەرەك بولماي قالعان, باسەكەگە قابىلەتسىز لەگيونەرلەردى ەمەس, شىنىمەن دە مىقتىلاردى شاقىرتۋ قاجەت. شەتەلدىك ويىنشىنى الىپ كەلسەك, وندا ونىڭ دەڭگەيى ءبىزدىڭ فۋتبولشىلاردان ءبىر باس جوعارى بولۋى قاجەت. ءوزىم رەسەي مەن تۇركيادا لەگيونەر بولىپ كوردىم. ول جاقتا تالاپ وتە جوعارى, سەن جەرگىلىكتى فۋتبولشىلارعا قاراعاندا ەكى ەسە سۇرالاسىڭ. ال بىزدە ەكىنشى التىلىقتاعى كلۋبتاردىڭ كوبىسىندە دەڭگەيى تومەن لەگيونەرلەر از ەمەس», – دەپ قوستى ول.

سماقوۆ لەگيونەرلەردەن باس تارتۋ شەتەلدە وينايتىن قازاقستاندىق فۋتبولشىلارعا دا كەرى اسەرىن تيگىزۋى مۇمكىن دەپ وتىر.

«ەۋرازيالىق ەكونوميكالىق وداق ەلدەرىنىڭ فۋتبولشىلارى ءوزارا لەگيونەر سانالمايدى. ەگەر قارجىلاندىرۋ تۇبەگەيلى توقتايتىن بولسا, تيىسىنشە ولار بىزگە كەلىپ ويناي الماسا, ءبىزدىڭ فۋتبولشىلار دا ول مەملەكەتتەردە ونەر كورسەتپەيدى دەگەن ءسوز. تاياقتىڭ ەكى ۇشى بار, وسىنىڭ ءبارىن ەسكەرۋىمىز كەرەك», – دەدى بۇرىنعى فۋتبولشى.