Legıonerlerden bas tartsaq jaǵdaı qaýipti – Samat Smaqov

Foto: Sports.kz

Ol legıonerlersiz otandyq fýtbol quldyraıdy dep otyr, dep jazady qandastar.kz

Qazirgi ýaqytta elimizde legıonerlerdi qarjylandyrýdy toqtatý máselesi zań jobasy aıasynda sheshilip jatyr. Al Qazaqstan fýtbolynda legıonerdiń kóptigi jaıly aıtýdyń ózi artyq, odan qaldy QPL-da sheteldik oıynshylarǵa lımıt te alynyp tastalǵan dep habarlady 1bol.kz.

Al zań jobasy qabyldansa, jaǵdaı qalaı ózgeredi? Osy oraıda ardager fýtbolshy Samat Smaqovtyń pikirin bilýdi jón kórdik.

«Astana» klýbynyń tehnıkalyq dırektory mundaı jaǵdaıda klýbtar arasyndaǵy aıyrmashylyq tym ulǵaıyp ketetinin aıtady.

«Legıonerlerdi qarjylandyrý toqtatylsa, onda bizde legıoner qalmaıdy degen sóz. QPL-daǵy óz oryndaryn saqtap qalýǵa kúresip jatqan klýbtarǵa eshkim aqsha bermeıdi, olarda onsyz da demeýshi joq. Alǵashqy orynda turǵan klýbtar óıtip-búıtip demeýshi tabýy múmkin, al basqalarynyń hali múshkil. Iaǵnı deńgeı múlde alshaqtap ketedi. О́zimiz de sol deńgeıi joǵary legıonerlerge, aǵa býynǵa qarap óstik, úırendik, jastar da dál solaı», – deıdi Smaqov.

Sonymen qatar ol legıonerlersiz otandyq fýtbol quldyraıdy dep sanaıdy. Samat mundaı zań qabyldanbas buryn bul máseleler jan-jaqty talqylanýy kerektigin aıtady. Biraq ulttyq chempıonatta deńgeıi tómen legıonerlerdiń de kóptigin joqqy shyǵarmady.

«Bizdiń chempıonattyń deńgeıi onsyz da tómen, legıonerlersiz jaǵdaı tipti qıyndap ketedi. Sondyqtan bul jerde ortaq sheshim qabyldanýy kerek dep oılaımyn. Múmkin lımıt engizý kerek shyǵar. Bastysy, óz elderinde eshkimge kerek bolmaı qalǵan, básekege qabiletsiz legıonerlerdi emes, shynymen de myqtylardy shaqyrtý qajet. Sheteldik oıynshyny alyp kelsek, onda onyń deńgeıi bizdiń fýtbolshylardan bir bas joǵary bolýy qajet. О́zim Reseı men Túrkııada legıoner bolyp kórdim. Ol jaqta talap óte joǵary, sen jergilikti fýtbolshylarǵa qaraǵanda eki ese suralasyń. Al bizde ekinshi altylyqtaǵy klýbtardyń kóbisinde deńgeıi tómen legıonerler az emes», – dep qosty ol.

Smaqov legıonerlerden bas tartý shetelde oınaıtyn qazaqstandyq fýtbolshylarǵa da keri áserin tıgizýi múmkin dep otyr.

«Eýrazııalyq ekonomıkalyq odaq elderiniń fýtbolshylary ózara legıoner sanalmaıdy. Eger qarjylandyrý túbegeıli toqtaıtyn bolsa, tıisinshe olar bizge kelip oınaı almasa, bizdiń fýtbolshylar da ol memleketterde óner kórsetpeıdi degen sóz. Taıaqtyń eki ushy bar, osynyń bárin eskerýimiz kerek», – dedi burynǵy fýtbolshy.