«Lonely Planet»: Qazaqstan 2025 jyly saıahattaýǵa tıis úzdik elderdiń tizimine endi

Foto: Týrızm jáne sport mınıstrligi

Halyqaralyq Lonely Planet jýrnaly Qazaqstandy jyl saıynǵy Best in Travel 2025 reıtınginde saıahattaýǵa arnalǵan eń úzdik elderdiń biri retinde tanydy, dep habarlaıdy Qandastar.kz.

Jýrnal sarapshylary jyl saıyn saıahatshylar, qyzmetkerler, avtorlar jáne týrızm salasyndaǵy basqa da mamandardyń usynystaryna negizdelgen baǵyttardy muqııat taldap, úzdikterdi anyqtaıdy. 2025 jylǵy tańdaý Qazaqstanǵa túsip otyr. Elimiz sheteldik sala sarapshylaryn baı tarıhymen, alýan túrli tabıǵatymen jáne biregeı mádenı murasymen baýrap alǵan.

«Qazaqstannyń Lonely Planet sekildi álemdegi bedeldi basylymnyń Best in Travel 2025 reıtınginde bolýy – elimizdiń týrızmine álem boıynsha qyzyǵýshylyqtyń artyp kele jatqanyn kórsetedi. Eldiń shynaıy mádenıeti men alýan túrli tabıǵatyn halyqaralyq deńgeıde ilgeriletýdi jalǵastyra otyryp, biz turaqty týrızm prınıpterin ustanamyz», – dep atap ótti QR Týrızm jáne sport vıe-mınıstri Erjan Erkinbaev.

«Best in Travel 2025 — bul bizdiń jyl saıynǵy álemge arnalǵan júrekjardy hatymyzdyń sońǵy nusqasy. Biz osy basylymǵa engen baǵyttardy maqtan tutamyz jáne usynystarymyzdyń negizinde jatqan tereń túsinik pen jergilikti bilimmen bólisýge qýanyshtymyz. Bizdiń tizim kelesi jyly saıahatshylarǵa jańa baǵyttardy ashýǵa shabyttandyrady dep senemiz», – dedi Lonely Planet-tiń kontent boıynsha aǵa vıe-prezıdenti jáne atqarýshy redaktory Nıtıa Chambers.

Álemniń bedeldi basylymynyń tizimine engen Qazaqstan ejelgi dástúr men zamanaýı ómir toǵysqan el retinde sıpattalǵan. Elimizge kelgen árbir týrıst otanyna erekshe sezimmen oralatyny anyq. Lonely Planet basylymynyń maqalasynda: «Qazaqstan – tek saıahattaıtyn el emes, ashylýy tıis álem, saparǵa shyǵýdy qajet etetin jáne tarıhtyń bir bólshegi bolatyn el. Ejelgi Jibek jolynyń sybdyry Qazaqstan qalalaryn qorshap turǵan sheksiz dalada da estiledi», dep jazylǵan.

Aıta ketý kerek, Qazaqstannyń týrıstik áleýetin tek Lonely Planet jýrnaly ǵana emes, álemge tanymal týrıstik basylymdar da joǵary baǵalap otyr. Máselen, Conde Nast Traveler men Wanderlust basylymdary Qazaqstandy 2024 jylǵy álemdegi eń úzdik saıahat baǵyttarynyń tizimine engizgen. Almaty qalasy The New York Times reıtıngi boıynsha 52 úzdik týrıstik baǵyttyń qataryna kirdi.