لرت-نىڭ العاشقى ۆاگوندارى رەلستەرگە قويىلىپ جاتىر

استاناعا جاقىندا عانا كەلگەن كوك ۆاگوندار ارنايى تەحنيكا كومەگىمەن رەلستەرگە ورناتىلىپ جاتىر. ولار قىركۇيەككە جوسپارلانعان سىناقتىق ىسكە قوسۋعا دايىندالۋدا, دەپ حابارلايدى Qandastar.kz اقپارات پورتالى.

ەلورداعا جەڭىل رەلستى كولىكتىڭ العاشقى ەكى قۇرامى جەتكىزىلدى. ءاربىر قۇرام ءتورت ۆاگوننان تۇرادى جانە ولار ارنايى جابدىقتالعان اۆتوترايلەرلەرمەن جەتكىزىلدى.

«ۆاگوندار قىتايدىڭ تانشان قالاسىندا وندىرىلگەن. اۆتوكولىكپەن جەتكىزۋ قىتاي مەن قازاقستان اۋماعى ارقىلى وتەتىن, ۇزىندىعى 5 300 شاقىرىمنان اساتىن مارشرۋتپەن جۇزەگە اسىرىلدى. بارلىق جول 10 كۇنگە سوزىلدى. ۆاگون بولىكتەرىن اۆتوترايلەر پلاتفورمالارىنا تيەۋ زاۋىتتا كرانداردىڭ كومەگىمەن جۇرگىزىلدى», — دەپ حابارلادى قالالىق كولىك جۇيەسىندە.

قالالىق كولىك جۇيەسىنىڭ مالىمەتىنشە, ۇزىندىعى 60 مەترگە جۋىق پويىزدار تولىقتاي اۆتوماتتاندىرىلعان GOA 4 جۇيەسىمەن جابدىقتالعان. بۇل جۇيە پويىزداردىڭ ەسىكتەرىن وزدىگىنەن اشىپ-جابۋعا, توقتاۋعا جانە جىلدامدىقتى ارتتىرۋعا, دەپوعا كىرىپ-شىعۋعا, ۆاگونداردىڭ جاي-كۇيى مەن اراقاشىقتىعىن باقىلاۋعا مۇمكىندىك بەرەدى. باسقارۋ جۇيەسى تولىقتاي پيلوتسىز, الايدا وپەراتورلار ولاردىڭ جۇمىسىن ۇنەمى باقىلاپ وتىرادى. جولاۋشىلاردىڭ جايلىلىعى مەن قوزعالىس ساپاسىن ارتتىرۋ ءۇشىن ۆاگوندار وندىرىسىندە زاماناۋي, جەڭىل جانە بەرىك ماتەريالدار پايدالانىلعان.

جىلجىمالى قۇرامنىڭ جالپى تەحنيكالىق سيپاتتامالارى:

ۇزىندىعى: 59,97 م,

ەنى: 2,8 م,

بيىكتىگى: 3,8 م,

قۋات كوزى: ءۇشىنشى رەلس, 750 ۆ,

سىيىمدىلىعى: 600-دەن استام جولاۋشى,

ەڭ جوعارى جىلدامدىق: 80 كم/ساع,

ورتاشا پايدالانۋ جىلدامدىعى: 39,5 كم/ساع,

سالماعى: 94 ت (جولاۋشىلارسىز).

ۆاگونداردى ساتىپ الۋ جانە جەتكىزۋ EPC-شارت اياسىندا جۇزەگە اسىرىلدى, قوسىمشا بيۋدجەت قارجىلاندىرۋى قاجەت بولمادى.

ەسكە سالا كەتەيىك, بيىلعى جىلدىڭ قىركۇيەك ايىندا تەحنيكالىق ىسكە قوسۋدان كەيىن لرت-نىڭ جولاۋشىلار تاسىمالىنا ارنالعان تولىققاندى ىسكە قوسىلۋى 2026 جىلدىڭ كوكتەمىنە جوسپارلانىپ وتىر.