مايقايىڭ كەنىشىندەگى اۆتوبۋس اپاتىندا قازا تاپقان قۇتقارۋشىنىڭ وتباسى كومپانيادان 120 ملن تەڭگە ءوندىرىپ الدى

كوللاج Stan.kz

مايقايىڭ التىن كەشىنىندە اۆتوبۋس اپاتىندا قازا تاپقان قۇتقارۋشىنىڭ وتباسى كومپانيادان 120 ميلليون تەڭگە ءوندىرىپ الدى. بۇل تۋرالى Stan.kz اقپارات اگەنتتىگى حابارلايدى.

2024 جىلدىڭ 4 قاڭتار كۇنى پاۆلودار وبلىسىنداعى مايقايىڭ كەنىشى ماڭىندا قۇتقارۋشىلار مىنگەن اۆتوبۋس شۇڭقىرعا قۇلاپ كەتكەنى تۋرالى جازعان ەدىك. شۇڭقىرعا قۇلاعان اۆتوبۋستىڭ ىشىندەگى ءتورت ادام كوز جۇمدى. وقيعادان كەيىن قۇرىلعان ارنايى كوميسسيا وقىس وقيعاعا تەكسەرۋ جۇرگىزىپ, ناتيجەسىندە جۇمىس بەرۋشى «كاسىبي اسكەريلەندىرىلگەن اپاتتىق-قۇتقارۋ قىزمەتى» جشس رەسپۋبليكالىق ورتالىق شتابىنىڭ 100% كىنالى ەكەنى انىقتادى.

«قايتىس بولعان قۇتقارۋشى ت-نىڭ اناسى, قىزى, ۇلى جانە اپكەسى قىزمەتتىك مىندەتتەرىن ورىنداۋ كەزىندە قايتىس بولۋىنا بايلانىستى مورالدىق زالالدى وتەۋ تۋرالى تالاپ ارىزبەن جۇگىندى. مورالدىق زالال رەتىندە ولارعا كەلتىرىلگەن مورالدىق ازاپ, قازانىڭ اۋىرلىعى مەن جەرلەۋ كەزىندە مارقۇممەن قوشتاسۋ مۇمكىن بولماۋى, جۇمىس بەرۋشىنىڭ كوڭىل ايتىپ, قولداۋ كورسەتپەۋى كورسەتىلگەن», – دەلىنگەن ەكىباستۇز قالالىق سوتىنىڭ حابارلاماسىندا.

سوت اپاتقا جۇمىس بەرۋشىنىڭ 100% كىنالى ەكەنىن نەگىزگە الا وتىرىپ, قايتىس بولعان قۇتقارۋشىنىڭ تۋىستارىنىڭ تالاپتارىن تولىق كولەمدە قاناعاتتاندىرىپ, تۋىستارىنىڭ ارقايسىسىنىڭ پايداسىنا سۇرالعان 30 ملن تەڭگە كولەمىندە مورالدىق شىعىندى ءوندىرۋ تۋرالى شەشىم شىعاردى, مورالدىق زالالدىڭ جالپى سوماسى 120 ملن تەڭگەنى قۇرادى.

سوت شەشىمى جاريالانعاننان كەيىن مارقۇمنىڭ قىزى يانا وسولودكوۆا كوزىنە جاس الدى.

«مارقۇم اكەمنىڭ جانە وتباسىمنىڭ نامىسىن قورعاپ شىققانىما قۋانىشتىمىن», – دەدى يانا.

سوت شەشىمى زاڭدى كۇشىنە ەنگەن جوق.

ەسكە سالساق, 2024 جىلدىڭ 25 شىلدەسىندە شۇڭقىرعا قۇلاعان اۆتوبۋستىڭ ىشىندەگى ءتورتىنشى قۇتقارۋشىنىڭ دەنەسى اپاتتان جارتى جىل وتكەندە جەر بەتىنە شىعارىلعان ەدى. مارقۇم 75 مەتر تەرەڭدىكتەن تابىلىپ, قالدىقتارى ساراپتاماعا جىبەرىلدى.