Maıqaıyń kenishindegi avtobýs apatynda qaza tapqan qutqarýshynyń otbasy kompanııadan 120 mln teńge óndirip aldy

Kollaj Stan.kz

Maıqaıyń altyn keshininde avtobýs apatynda qaza tapqan qutqarýshynyń otbasy kompanııadan 120 mıllıon teńge óndirip aldy. Bul týraly Stan.kz aqparat agenttigi habarlaıdy.

2024 jyldyń 4 qańtar kúni Pavlodar oblysyndaǵy Maıqaıyń kenishi mańynda qutqarýshylar mingen avtobýs shuńqyrǵa qulap ketkeni týraly jazǵan edik. Shuńqyrǵa qulaǵan avtobýstyń ishindegi tórt adam kóz jumdy. Oqıǵadan keıin qurylǵan arnaıy komıssııa oqys oqıǵaǵa tekserý júrgizip, nátıjesinde jumys berýshi «Kásibı áskerılendirilgen apattyq-qutqarý qyzmeti» JShS respýblıkalyq ortalyq shtabynyń 100% kináli ekeni anyqtady.

«Qaıtys bolǵan qutqarýshy T-nyń anasy, qyzy, uly jáne ápkesi qyzmettik mindetterin oryndaý kezinde qaıtys bolýyna baılanysty moraldyq zalaldy óteý týraly talap aryzben júgindi. Moraldyq zalal retinde olarǵa keltirilgen moraldyq azap, qazanyń aýyrlyǵy men jerleý kezinde marqummen qoshtasý múmkin bolmaýy, jumys berýshiniń kóńil aıtyp, qoldaý kórsetpeýi kórsetilgen», – delingen Ekibastuz qalalyq sotynyń habarlamasynda.

Sot apatqa jumys berýshiniń 100% kináli ekenin negizge ala otyryp, qaıtys bolǵan qutqarýshynyń týystarynyń talaptaryn tolyq kólemde qanaǵattandyryp, týystarynyń árqaısysynyń paıdasyna suralǵan 30 mln teńge kóleminde moraldyq shyǵyndy óndirý týraly sheshim shyǵardy, moraldyq zalaldyń jalpy somasy 120 mln teńgeni qurady.

Sot sheshimi jarııalanǵannan keıin marqumnyń qyzy Iana Osolodkova kózine jas aldy.

«Marqum ákemniń jáne otbasymnyń namysyn qorǵap shyqqanyma qýanyshtymyn», – dedi Iana.

Sot sheshimi zańdy kúshine engen joq.

Eske salsaq, 2024 jyldyń 25 shildesinde shuńqyrǵa qulaǵan avtobýstyń ishindegi tórtinshi qutqarýshynyń denesi apattan jarty jyl ótkende jer betine shyǵarylǵan edi. Marqum 75 metr tereńdikten tabylyp, qaldyqtary saraptamaǵa jiberildi.