“مالىمدەمەڭىز الاۋىزدىق تۋدىرادى”: دەپۋتات ەڭبەك ءمينيسترىن سىنعا الدى

فوتو: سكرين

دەپۋتات ايدوس سارىم ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆاعا ساۋال جولداپ, ءمينيستردى كۇماندى مالىمدەمەلەر جاساماۋعا شاقىردى. بۇل تۋرالى   qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

دەپۋتات ءوز ساۋالىندا ەڭبەك مينيسترلىگىنىڭ جۇمىس ىستەيتىن زەينەتكەرلەرگە زەينەتاقى تولەمدەرىن توقتاتۋ تۋرالى ۇسىنىسىنىڭ حالىق اراسىندا الاڭداۋشىلىق تۋدىرعانىن ايتتى.

«مۇنداي شارا ازاماتتاردىڭ ەڭبەك ەتۋ جانە الەۋمەتتىك قامسىزداندىرۋ قۇقىعىنا كەپىلدىك بەرەتىن كونستيتۋتسيانىڭ بابىنا قايشى كەلەدى. ءاربىر قازاقستاندىقتىڭ زەينەتكەرلىك جاسقا جەتكەندە دە ادال ەڭبەك ەتۋگە قۇقىعى بار, ايتپەسە كاسىبي ۇستازدار, دارىگەرلەر جانە باسقا ساناتتاعى ماماندار تاپشىلىعىن قالاي شەشۋگە بولادى?», – دەيدى ايدوس سارىم.

دەپۋتات رەسپۋبليكا كولەمىندە ەكونوميكانىڭ بارلىق سالاسىندا وتكىر كادرلىق داعدارىس بار ەكەنىن اتاپ ءوتتى.

«تاعى ءبىر تەندەنتسيا – قازاقستاننان شەتەلگە جۇمىس كۇشىنىڭ, نەگىزىنەن جاستاردىڭ كەتۋى بايقالادى. مۇنداي تەندەنتسيالار جۇمىس ورىندارىنىڭ جوقتىعىنان ەمەس, جالاقىنىڭ تومەندىگىنەن, ەڭبەك جاعدايلارىنىڭ تارتىمسىزدىعىنان بولىپ وتىر», – دەدى دەپۋتات.

دەپۋتاتتىڭ ايتۋىنشا, ساراپتامالار بۋىندار اراسىندا ايتارلىقتاي الشاقتىق بارىن كورسەتكەن, بۇل ەڭبەك نارىعى ءۇشىن قوسىمشا تاۋەكەلدەردى تۋدىرادى. بۇل ماسەلەلەر ەلدەگى كادر دايارلاۋ جۇيەسىن تەرەڭ رەفورمالاۋ جانە ەڭبەك جاعدايىن جاقسارتۋ قاجەتتىلىگىن كورسەتەدى.

«مۇنداي باستامالار بۋىندار اراسىندا الاۋىزدىق تۋدىرىپ, زەينەتكەرلەردى جاستارعا قارسى قويادى. زەينەتكەرلەر جاستاردىڭ جۇمىسىن «تارتىپ الىپ جاتىر» دەگەن پىكىر ورىنسىز. وسىعان بايلانىستى الداعى ۋاقىتتا الەۋمەتتىك شيەلەنىس تۋدىراتىن مالىمدەمەلەرگە جول بەرمەۋگە شاقىرامىن», – دەدى دەپۋتات.

ەسكە سالايىق, بۇعان دەيىن دەپۋتات اسحات ايماعامبەتوۆ ەڭبەك ءمينيسترىن جۇمىس ىستەيتىن زەينەتكەرلەردى زەينەتاقىدان ايىرۋى تۋرالى ۇسىنىسىنان كەيىن سىنعا العان ەدى.