Mańǵystaýda 1 mınýtta myń sóz oqıtyn oqýshy óziniń qupııasyn aıtty

Mańǵystaý oblysynda 1 mınýtta myń sóz oqıtyn Samır Valerıı óziniń qupııasymen bólisti. Estigen qulaqqa sengisiz bolǵanmen, nıeti bar adam úshin bul qıyn emes, deıdi talantty oqýshy Sputnik Qazaqstan tilshisine.

«Negizi Araı Rahmetova apaıym úıretken ádispen oqyp júrmin. Meniń apaıym ámbebap adam», — dep maqtandy 12 jastaǵy oqýshy.

Samır bul ádisti meńgerip oqý jyldamdyǵyn arttyrýmen aınalysqanyna 2 jyl. Ustazyn áleýmettik jeli arqyly tapqan 6-synyp oqýshysy áý basta mınýtyna 90 sóz oqıtyn.

«Araı apaı úıge tapsyrmalar beredi, túnimen otyryp oqyp, ony beınejazbaǵa túsirip jiberetin em. Biraq kishkentaı baýyrlarym mazamdy alyp, kedergi keltiretin», — deıdi Samır.

Mańǵystaýda kitap az

Kishkentaı oqymystyny qynjyltatyny – oqıtyn kitaptardyń azdyǵy.

«Mańǵystaýda kitap satatyn jerler bar, biraq az. Maǵynaly kitaptardy eki jerde ǵana satady. Mysaly, Aqtaýda kitap satatyn jerler bar, biraq akııa, jeńildik degen joq. Eger kitap dúkenderi kóp bolsa, balalarǵa yńǵaıly jaǵdaı jasalsa, oqymysty balalar kóp bolar edi. Qazaqsha kitaptar az, negizi qazaqsha kitaptardy kóp shyǵarsa, ol kóp oqylsa, patrıottyq sezim damıtyn edi. Qazaqtarǵa bilim kóp kerek», — deıdi Samır Valerıı.

Prezıdenttiń aldyna barǵym keledi

Armany bıik, talaby kúshti Samır bir ǵana emes, birneshe saladan juldyz bolǵym keledi deıdi.

«Bolashaqqa josparym kóp: prezıdenttiń aldyna barǵym keledi. Bokstan álem chempıony bolsam, Enshteın sııaqty ǵulama bolsam deımin. Dımash Qudaıbergen aǵam sııaqty án de aıtqym keledi», — deıdi oqymysty bala.

Balamnyń jetistigin elden estip bildim

Ákesi Nurlybek Amanbaev jurt aıtqanda ǵana balamnyń talanty baryn bildik deıdi. Aıtýynsha, Samır elmen sóıleskendi jaqsy kóretin kópshil, ashyq minezdi.

«О́zge baladan erekshe dep aıta almaımyn, qarapaıym ǵana. Úıde sabaǵyn qadaǵalap, jiti nazarǵa alǵan emespiz. О́zi áńgime aıtqandy jaqsy kóredi. Saǵattap kitap oqyp, úıde úzdiksiz daıyndalady dep te aıta almaımyn. Jyldam oqý ortalyǵyndaǵy muǵalimi shaqyrǵanda ǵana baryp daıyndalady. Kóbine qııal-ǵajaıyp qazaqsha kitaptardy oqyǵandy jaqsy kóredi», — deıdi Nurlybek Amanbaev.

Samır gıtara oınap, dombyra shertedi, sportpen de aınalysady.

Orta mektepti unatpady

«Samır birneshe mektepte oqydy, gımnazııa, jekemenshik mektep, sosyn orta mektepke aýysty. Sol kezde ol qınaldy, óıtkeni 30 oqýshynyń arasynda eleýsiz bop qaldy. «Basym aýyrdy, shýlaı beredi» dep unatpady. О́zine nazar aýdartqandy, kópshiliktiń aldynda júrgendi unatady. Jańa muǵalimder, jańa orta, durys beıimdele almady. Jeke mektepte 15-16 oqýshymen oqyǵan. Al bul mektepte ondaı jaǵdaı jasalmady», — deıdi Samırdiń ákesi.

Muǵalimder baǵasyn tómendetken

Samırdiń ustazy – 26 jastaǵy Araı Rahmetova. Fılosofııa mamandyǵynyń ıegeri bala tárbıeleýdi jón kóripti.

«Bala kúnimde meni muǵalimder «sabaq oqymaısyń» dep tym shettetip, bolashaqqa degen qulshynysymdy túsirgen sátter boldy. Samırdiń de basynan sondaı jaǵdaılar ótken. Baǵasyn tómendetip, durys baǵalamaǵan. Oqymaıtyn oqýshy joq, oqytpaıtyn ata-ana men ustaz bar der edim. Balanyń bolmysyn zerttep qana bilim berý kerek. Eger balanyń talantyn asha bilse, odan ǵulama shyǵady. Samır óte izdenimpaz, talapty bala. Bilimge qulshynyp turady», — deıdi Araı Rahmetova.

21 kitaptyń avtory bolǵan Araı Rahmetova kitap oqımyn degenderge tálim berip júr. Kásipker men ustazdan bastap úıretip keledi. Al oqýshyǵa berer bilim óte sapaly bolý kerek, deıdi ol.

Analar bilimdi bolý kerek

«Maqsatym – bilimdi ata-ana, ustaz bolsa deımin. О́ıtkeni álem sol kisilerdiń qolynda. Eger olar saýatsyz bolsa tirshilik qıyndap ketedi. Qazaqstannyń oqý deńgeıi ókinishke oraı tómendep ketti», — deıdi ol.

25 oqýshyǵa bir ǵana teńdeýdi jappaı oqytpaı, jeke-jeke zerttep bilim berý kerek, deıdi ustaz.

«Maǵan kelip tálim alǵysy keletin balalardyń ata-anasy: «oı, onyń qajeti ne, kitap oqyp, myqty jumys taýyp ketpeıdi báribir. Qazaqstanǵa bunyń qajeti ne» dep ketip qalady. Meniń «áttegen-aıym» – analar men ustazdardyń saýatyn ashý myna zamanda óte qıynǵa soǵyp tur. Bara-bara robottar basqarady, sonda bilimsiz adam olarǵa baǵynady, ary qaraı ne bolamyz», — deıdi muǵalim.

Araı shákirti Samır sııaqty balalardyń bilimin arttyrý kerek degendi aıtady. О́ıtkeni balaǵa laıyqty berilmegen bilim – bolashaq jaqsy ómirge shabylǵan balta deıdi.