ماڭعىستاۋلىق كارديوحيرۋرگتار جۇرەككە ەرەكشە وتا جاسادى

ماڭعىستاۋ وبلىستىق كوپبەيىندى اۋرۋحاناسىندا ەندى كارديوحيرۋرگ-دارىگەرلەر جۇرەككە وتا جاساۋ ءۇشىن ءتوستى تەرەڭ تىلمەي-اق, قابىرعا ارالىق شاعىن كەسىندى ارقىلى اورتا-كورونارلى شۋنتتاۋ وپەراتسياسىن جاسايدى, — دەپ حابارلايدى وبلىستىق اۋرۋحانانىڭ ءباسپاسوز قىزمەتى.

كارديوحيرۋرگ-دارىگەر ءابۋناسىر سۋحانوۆتىڭ ايتۋىنشا, بۇعان دەيىن اورتا-كورونارلى شۋنتتاۋ وپەراتسياسى كلاسسيكالىق جولمەن جاسالدى. ياعني, وتا كەزىندە ناۋقاستىڭ ءتوسىن ارامەن 25 سم دەيىن كەسەتىن ەدى. ال قازىر وڭتايلى ءادىس ارقىلى ناۋقاسقا قاۋىپسىز ءارى جەڭىل تۇردە وتەتىن وپەراتسيانى ەنگىزدى.

«67 جاستاعى اقتاۋلىق تۇرعىنعا قابىرعا اراسىنان 5-7 سم كەسىندى ارقىلى اورتا-كورونارلى شۋنتتاۋ وپەراتسياسى جاسالدى. ءۇش شۋنت جاسادىق, قازىرگى تاڭدا ناۋقاستىڭ جاعدايى جاقسى. ەركىن قوزعالىپ, قولىن اۋىرسىنۋسىز كوتەرە الادى. ەگەر ءبىز ءتوسىن كەسۋ ارقىلى وتا جاسايتىن بولساق, وندا ناۋقاس 6 اي بويى ارقاسىمەن جاتاتىن ەدى. ال قازىر ناۋقاس وتادان كەيىنگى ءۇشىنشى كۇنى وزدىگەنەن جۇرەدى», — دەدى كارديوحيرۋرگ-دارىگەر ءابۋناسىر سۋحانوۆ.

سونىمەن قاتار اتالعان وتانىڭ تيىمدىلىگى – ءتوستىڭ اشىلۋ قاۋپى بولمايدى, وڭالتۋ كەزەڭى تەز جۇرەدى, تىلىك كولەمى از بولعاندىقتان ناۋقاس كوپ قان جوعالتپايدى.

«2022 جىلى جۇرەگىم اۋىرىپ, وتا جاسالىپ, ءتورت رەت ستەند قويدىرعان ەدىم. ءبىر-ەكى جىلدان سوڭ قايتا جۇرەگىم اۋىرا باستادى. وبلىستىق اۋرۋحانادا كارديوحيرۋرگ ءابۋناسىر سۋحانوۆ ىنىمە وتا جاساعان ەكەن, ناتيجەسىن كورىپ, مەن دە جۇرەگىمە وتا جاساتۋعا شەشىم قابىلدادىم. قازىر جاعدايىم جاقسى, ەشقانداي اۋىرسىنۋ جوق. اۋرۋحانا دارىگەرلەرى مەن مەدبيكەلەرى دە جاقسى قاراپ جاتىر. ءابۋناسىر جەتپىس ۇلىنا جانە اۋرۋحانا باسشىلىعىنا العىسىم شەكسىز», — دەدى ناۋقاس ب. ساتكانوۆ.

ايتا كەتەيىك, ەندى وبلىس تۇرعىندارى استانا مەن الماتىعا بارماسا دا بولادى. سەبەبى بىلىكتى دارىگەرلەر كارديولوگيالىق كۇردەلى وپەراتسيالاردى وبلىستىق كوپبەيىندى اۋرۋحاناسىندا ءجيى جاساپ جاتىر. جوسپارلى وپەراتسيالار مىندەتتى الەۋمەتتىك مەديتسينالىق ساقتاندىرۋ, ال شۇعىل وتا مەديتسينالىق كومەكتىڭ كەپىلدىك بەرىلگەن كولەمى بويىنشا جۇرگىزىلەدى.