ماڭعىستاۋلىق وقۋشىنىڭ ولىمىنە قاتىستى ءىس تەرگەلۋدە

فوتو: اشىق دەرەككوز

ماڭعىستاۋ وبلىسى بەينەۋ اۋدانىنا قاراستى اقجىگىت اۋىلىندا مەكتەپ وقۋشىسى ساعىندىق قۇرمانياز ۇلىنىڭ ولىمىنە قاتىستى تەرگەۋ امالدارى جۇرگىزىلىپ جاتىر, دەپ حابارلايدى qandastar.kz

قايعىلى وقيعا 2024 جىلعى 8 ساۋىردە ورىن العان. مارقۇمنىڭ دوستارى مەن تۋىستارى بۇل جاعدايدىڭ ۇزاق ۋاقىت بويى جاسالعان جۇيەلى قورلىق پەن كۇش كورسەتۋ ارەكەتتەرىنىڭ سالدارى ەكەنىن ايتىپ وتىر. ولاردىڭ سوزىنشە, 20-21 جاستاعى جاستار سوڭعى ءۇش جىل بويى جوعارى سىنىپ وقۋشىلارىن ءوز شارۋاسىنا جۇمساپ, قوقان-لوقى كورسەتىپ كەلگەن. ساعات 16:30 شاماسىندا جىگىتتەر وقۋشىلارعا «قورا تازالاۋعا كەلىڭدەر» دەپ بۇيرىق بەرگەن. بۇعان دەيىن دە ولار وقۋشىلاردى كارىز تازالاۋ, قۇبىر جوندەۋ سياقتى جۇمىستارعا ماجبۇرلەپ جۇمساعان.

سول كۇنى كۇدىكتىلەر بالالاردى كەشكە تاعى شاقىرىپ, قاتارعا تۇرعىزىپ, ءبىر-بىرلەپ سوققى جاساعان. كۋاگەرلەردىڭ ايتۋىنشا, ساعىندىق قۇرمانياز ۇلى كەۋدە تۇسىنان ءبىر رەت سوققى العان سوڭ, قىرىلداپ, سول جەردە جان تاپسىرعان. قىلمىس تەمىرجول استىنداعى قاراڭعى وتكەلدە جاسالعان. كۇدىكتى وقيعا ورنىنان ەش الاڭسىز كەتىپ قالىپ, كەيىن وقيعاعا قاتىسقان بالالارعا قىسىم كورسەتىپ, شىندىقتى جاسىرۋعا ماجبۇرلەگەن. ول ساعىندىقتىڭ ءولىمىن «جۇرەك تالماسى» دەپ ءتۇسىندىرۋدى تالاپ ەتكەن.

مارقۇمنىڭ نەمەرە اعاسى ساكەن قۋانىشبەكوۆتىڭ ايتۋىنشا, ساعىندىق ەسىنەن تانعان كەزدە كۇدىكتى وعان كومەكتەسۋدىڭ ورنىنا, «تالىپ جاتىر, ويانادى» دەپ ءمان بەرمەگەن. سونىمەن قاتار, اعاسى باستى كۇدىكتىنىڭ ۆولەيبول جارىسىنا ىرىكتەۋ كەزىندە ساعىندىققا جول بەرمەي قالعانىن ايتىپ, بۇل باقتالاستىق تا كۇش قولدانۋعا سەبەپ بولعانىن جەتكىزدى.

العاشقىدا ساعىندىقتىڭ ءولىمى جۇرەك تالماسىنان بولدى دەگەن اقپارات تاراعانىمەن, كەيىن دوستارى بولعان جايتتى اشىق ايتىپ, مارقۇمنىڭ دەنەسىندە سوققى ىزدەرى بارى انىقتالعان. 12 ءساۋىر كۇنى رەسمي ارىز ءتۇسىپ, سول كۇنى كۇدىكتىلەر ۇستالدى. قازىرگى تاڭدا نەگىزگى كۇدىكتى قاماۋعا الىنعان. تەرگەۋ جالعاسۋدا, ال اۋىل تۇرعىندارى ءادىل شەشىم مەن ەڭ قاتاڭ جازانىڭ قولدانىلۋىن تالاپ ەتۋدە.