ماس كۇيىندە كولىك جۇرگىزگەن دەپۋتاتتى پوليتسيا ۇستادى

فوتو: اشىق دەرەككوز

شىعىس قازاقستان وبلىسى تارباعاتاي اۋدانىندا ماس كۇيدە كولىك تىزگىندەپ, پوليتسيا قىزمەتكەرلەرىنە قارسىلىق كورسەتكەن دەپۋتات 17 تاۋلىككە قاماۋعا الىندى, دەپ جازدى qandastar.kz

تارباعاتاي اۋداندىق ءماسليحاتىنىڭ دەپۋتاتى 23 جەلتوقساندا الكوگولدى ىشىمدىك ءىشىپ «NissanTeana» ماركالى اۆتوكولىك تىزگىنىنە وتىرعان. ونى پوليتسەيلەر قاراسۋ اۋىلى جەكسەنبى كوشەسىندە توقتاتقان.

دەپۋتات اقجار اۋىلىندا ورنالاسقان اۋرۋحاناعا مەديتسينالىق كۋالاندىرۋدان وتۋگە بارعىسى كەلمەي, ءتارتىپ ساقشىلارىنىڭ زاڭدى تالاپتارىنا باعىنباي, قارسىلىق كورسەتكەن.

مەديتسينالىق كۋالاندىرۋ جۇرگىزۋشىنىڭ «ورتا» دارەجەلى ماس كۇيدە بولعانىن كورسەتتى. سوت بارىسىندا ول ءوز كىناسىن تولىقتاي مويىندادى.

– سوت شەشىمىمەن ايىپتالۋشى اكىمشىلىك قۇقىق بۇزۋشىلىق تۋرالى كودەكسىنىڭ 608-بابى 1-بولىگى (ماس كۇيدە كولىك جۇرگىزۋ) جانە 667-بابى 1-بولىگى (پوليتسەيدىڭ زاڭدى تالابىنا باعىنباۋ) بويىنشا كىنالى دەپ تانىلىپ, 17 تاۋلىككە قاماۋعا الىندى. سونداي-اق 7 جىل مەرزىمگە كولىك قۇرالىن باسقارۋ قۇقىعىنان ايىرىلدى, – دەلىنگەن اۋداندىق سوت ۇكىمىندە.