Májiliste balalardyń qaýipsizdigine qatysty másele kóterildi

Elimizde balalardy kólikpen tasymaldaǵan kezde qaýipsizdik erejeleri saqtalmaıdy.

Bul týraly Palament Májilisiniń jalpy otyrysynda Úkimet basshysynyń orynbasary Berdibek Saparbaevtyń atyna joldaǵan saýalynda depýtat Artýr Platonov málim etti, dep habarlaıdy QazAqparat tilshisi. Balalardyń kópqabatty úılerdiń terezesinen qulaýy oqıǵalary jıilep bara jatqanyna toqtalǵan A. Platonov, 2017 jyly – 82 bala, 2018 jyly – 59, al 2019 jyly 75 bala qulaǵanyn jetkizdi. «Negizgi sebep  – ata-analar tarapynan tıisti baqylaýdyń bolmaýy», – dedi depýtat. Sonymen qatar ol jetkinshekterdiń sýǵa ketýi men ıis tıip ýlanýy faktileri erekshe alańdatanyn atap ótti. Budan bólek Artýr Platonov 12 jasqa deıingi balalardyń avtokóliktiń aldyńǵy oryndyǵynda otyrýy qaýiptiligine baılanysty pikir bildirdi. «Jol-kólik oqıǵasy jaǵdaıynda ári avtomobıldiń qaýipsizdik jastyqshasynyń iske qosylýy kezinde onyń soqqysy kishkentaı bala úshin aýyr bolatyny aıtpasa da túsinikti. Jalpy, joǵaryda aıtqandardy eskere otyryp, balalardyń mert bolýy men olardyń densaýlyǵyna zııan keltirý faktileri azaımaı tur. Bul óz kezeginde ata-analar men ókiletti memorgandardyń jaýapsyzdyǵyn baıqatady», – dedi ol. Osy oraıda depýtat qalyptasqan jaǵdaıdyń sebepterin qarastyrý men taldaý boıynsha arnaıy komıssııa qurýdy usyndy.

Derekkóz: inform.kz