مەديتسينالىق قىزمەت ساپاسى بويىنشا قايدا شاعىمدانۋعا بولادى

«دەنساۋلىق ساقتاۋ مينيسترلىگى ءوزىنىڭ باقىلاۋ فۋنكتسيالارى اياسىندا, سونداي-اق «الەۋمەتتىك مەديتسينالىق ساقتاندىرۋ قورى» كەاق كورسەتىلەتىن مەديتسينالىق قىزمەتتەردىڭ ساپاسى باقىلاۋ مەن مونيتورينگتى جۇزەگە اسىرادى. «اكىمشىلىك قۇقىق بۇزۋشىلىق تۋرالى» كودەكسىندە مەديتسينالىق قىزمەتتەردىڭ ءتارتىبىن, ستاندارتتارىن جانە ونىڭ ساپاسىز كورسەتىلگەنى ءۇشىن, سونداي-اق تمككك جانە ءمامس اياسىندا مەديتسينالىق كومەكتى اقىلى نەگىزدە كورسەتكەنى ءۇشىن اكىمشىلىك جاۋاپكەرشىلىك كوزدەلگەن.

ازاماتتار قوردىڭ فيليالىنا نەمەسە قر دەنساۋلىق ساقتاۋ مينيسترلىگىنىڭ مەديتسينالىق جانە فارماتسەۆتيكالىق باقىلاۋ كوميتەتىنىڭ اۋماقتىق بولىمشەسىنە مەديتسينالىق ۇيىمدى, ەمدەۋشى دارىگەردى كورسەتە وتىرىپ, ساپاسىز مەديتسينالىق كومەك كورسەتۋ فاكتىسى بويىنشا جۇگىنۋگە قۇقىلى.

سونىمەن قاتار, مەديتسينالىق ۇيىمداردا پاتسيەنتتەردى قولداۋ جانە ىشكى اۋديت قىزمەتى بار. ماسەلەنى شەشۋدى تالاپ ەتەتىن ءتۇرلى جاعدايلار تۋىنداعان كەزدە, مەديتسينالىق ساپا بويىنشا قىزمەتتىك تەرگەۋ جۇرگىزۋگە جانە پاتسيەنتتىڭ قۇقىقتارى بۇزىلعان جاعدايدا شارالار قابىلداۋ ءۇشىن وسى قىزمەتتەرگە جۇگىنۋگە بولادى.

«الەۋمەتتىك مەديتسينالىق ساقتاندىرۋ قورىنا جۇگىنىپ, ءوز قۇقىعىن قورعايتىن ازاماتتاردىڭ سانى جىل سايىن ارتىپ كەلەدى. ولاردىڭ ارىز-شاعىمىنا كەلەر بولساق, بىلتىر 1414 بىرىڭعاي بايلانىس ورتالىعىنا, Qoldau 24/7 ءموبيلدى قوسىمشاسىنا جانە قوردىڭ fms.kz سايتىنا 26 مىڭنان استام ءوتىنىش-شاعىم كەلىپ تۇسكەن. بۇعان كەڭەس الۋ دا كىرەدى. كوپ كەزدەسەتىن سۇراقتاردىڭ قاتارىندا مەديتسينالىق كومەكتى ساپالى كورسەتپەۋ, مەديتسينالىق كومەك كورسەتۋدەن باس تارتۋ, ءدارى-دارمەكتەردى بەرۋدەن باس تارتۋ, جالعان جازبالار, ءمامس اياسىندا كورسەتىلەتىن قىزمەتتەر بويىنشا كەڭەس بەرۋ بار. قور ماماندارى كەلىپ تۇسكەن وتىنىشتەر مەن شاعىمداردى جەكە-جەكە قارايدى جانە شەشىمىن جۇگىنگەن ازاماتقا جولدايدى. قاجەت بولعان جاعدايلاردا, جوسپاردان تىس مونيتورينگ جاسالادى. ونىڭ ناتيجەلەرى بويىنشا فاكتىلەر راستالسا, ەكونوميكالىق ىقپال ەتۋ شارالارى قابىلدانادى», – دەپ اتالىپ وتكەن دەنساۋلىق ساقتاۋ مينيسترلىگى اقپاراتىندا.