مەكتەپ وقۋشىلارى اراسىندا توبەلەس بولىپ, 11-سىنىپ وقۋشىسى اۋىر جاعدايدا قازا تاپتى

وزبەكستاننىڭ سامارقاند قالاسىنداعى پاحتاچين اۋدانىندا مەكتەپ وقۋشىلارى اراسىنداعى جانجال قايعىلى وقيعامەن اياقتالدى — جانجال توبەلەسكە ۇلاسىپ, 11-سىنىپ وقۋشىسى كوز جۇمدى, دەپ حابارلايدى Qandastar.kz. 

قۇقىق قورعاۋ ورگاندارىنىڭ مالىمەتىنشە, جانجال №1 مەكتەپتىڭ ءۇش وقۋشىسى مەن №12 مەكتەپتىڭ ەكى وقۋشىسى اراسىندا بولعان.

جاسوسپىرىمدەر Instagram الەۋمەتتىك جەلىسىندە ءبىر-ءبىرىن بالاعاتتاپ, كەيىن جەكە كەزدەسىپ, ماسەلەنى شەشپەك بولعان.

كەزدەسۋ توبەلەسپەن اياقتالىپ,  قاتىسۋشىلاردىڭ ءبىرى وقيعا ورنىندا كوز جۇمعان. وقيعا ورنىنا كەلگەن دارىگەرلەر ونىڭ بيولوگيالىق تۇرعىدا قايتىس بولعانىن راستاعان: ءپۋلسى سوقپاعان, كوز قاراشىعى كەڭەيىپ كەتكەن. سىرتتاي كورىنەتىن جاراقاتتار بولماعانىمەن, مويىن تۇسىندا جاراقات بەلگىلەرى مەن اۋىز بەن مۇرىننان قاننىڭ ءىزى بايقالعان.

اتالعان وقيعا بويىنشا وزبەكستان رەسپۋبليكاسى قىلمىستىق كودەكسىنىڭ 104-بابى 3-ءبولىمى «د» تارماعى بويىنشا («جابىرلەنۋشىنىڭ ولىمىنە اكەپ سوققان قاساقانا اۋىر دەنە جاراقاتىن سالۋ») قىلمىستىق ءىس قوزعالدى.

بۇل باپ بويىنشا 8 جىلدان 10 جىلعا دەيىن باس بوستاندىعىنان ايىرۋ جازاسى قاراستىرىلعان.

توبەلەسكە قاتىسقان بارلىق كامەلەتكە تولماعاندار كۇدىكتى رەتىندە ۇستالدى. تەرگەۋ جۇمىستارى جالعاسىپ جاتىر.