مەكتەپكە بالگەر شاقىرعان مەكتەپ تەكسەرىلمەك

• فوتو كوللاج: اشىق دەرەككوز

جامبىل وبلىسىنداعى مەكتەپكە «توميريس» لاقاپ اتىمەن بەلگىلى باقسى كەلگەن, دەپ حابارلايدى Qandastar.kz. ەڭ قىزىعى, ونىمەن وتەتىن كەزدەسۋگە مەكتەپ مۇعالىمدەرىنەن 4 مىڭ تەڭگەدەن اقشا جيناعان.

الەۋمەتتىك جەلىدەگى اقپاراتقا سۇيەنسەك, باقسىنىڭ 4 مەتر بولاتىن شلەيفى بار كويلەگىن وقۋشىلار سۇيرەپ جۇرگەن. ول مەكتەپكە كومەكتەسەمىن دەگەن الدارقاتۋ ويمەن مەكتەپكە جىرتىلعان كيىم, سىنعان ويىنشىقتار سونداي-اق ىسكە جارامايتىن كومپيۋتەر بەرگەن.

الەۋمەتتىك جەلىلەردە تارالعان ۆيدەو كوپشىلىكتىڭ نارازىلىعىن تۋدىرىپ ۇلگەردى. جەرگىلىكتى جۋرناليست ماديار ەرالى ۇلى ءوزىنىڭ جەلىدەگى پاراقشاسىندا ۆيدەونى ءبولىسىپ, ماسەلەنىڭ ءمان-جايى تۋرالى جازبا جاريالاعان. ءجۋرناليستىڭ ايتۋىنشا, “توميريس حانشايىم” بولىپ كيىنگەن ايەل تەرەڭوزەك اۋىلىنىڭ تۋماسى گۇلسارا سۋازقىزى ەكەن. ايەل ءوزىن دەنساۋلىق ساقتاۋ سالاسىنىڭ ۇزدىگى, مەديتسينا عىلىمدارىنىڭ دوكتورى, پروفەسسور, ميشەل نوسترادامۋس اتىنداعى پروسكوپيا عىلىمدارىنىڭ اكادەميگى دەپ تانىستىرعان.

باقسى ىشىمدىك پەن ەسىرتكىگە تاۋەلدىلىكتەن ەمدەيدى-مىس. «توميريس» مەكتەپكە «ماتەريالدىق كومەكتەن» بولەك 500 مىڭ اۋدارامىن دەپ ۋادە ەتكەن.  الايدا ول اقشا اۋدارىلماعان.

جەلىدە تاراعان اقپاراتقا قاتىستى جامبىل وبلىستىق بىلىم باسقارماسى مالىمدەمە جاسادى.

«جامبىل اۋدانى تۇرار رىسقۇلوۆا اتىنداعى ورتا مەكتەپ باسشىلىعىنىڭ ايتۋىنشا, وسى مەكتەپتىڭ تۇلەگى كوپباەۆا گۇلسارا سۋازقىزى از قامتىلعان وتباسىنان شىققان 100 وقۋشىعا قايىرىمدىلىق كومەك كورسەتۋدى ۇسىنعان. 2024 جىلدىڭ 29 تامىزىندا تەرەڭوزەك اۋىلىنىڭ مادەنيەت ۇيىندە اۋىل تۇرعىندارىنىڭ قاتىسۋىمەن ءىس-شارا وتكەن. مەكتەپ باسشىلىعى كەزدەسۋ تۋرالى جەرگىلىكتى اتقارۋشى بيلىككە حابارلاماعان. اتالعان ماسەلە بويىنشا جامبىل وبلىسى اكىمدىگىنىڭ بالالار قۇقىعىن قورعاۋ جونىندەگى ۋاكىلى, جامبىل وبلىسى اكىمدىگىنىڭ ءبىلىم بەرۋ سالاسىنداعى ساپانى قامتاماسىز ەتۋ باسقارماسى ارنايى تەكسەرىس جۇرگىزىپ جاتىر», – دەلىنگەن جامبىل وبلىستىق بىلىم باسقارماسىنىڭ حابارلاماسىندا.