مەملەكەت باسشىسى قۇرىلتايدا سالىق جۇيەسىنە قاتىستى ويىن جەتكىزدى

فوتو: اقوردا

ۇلتتىق قۇرىلتاي وتىرىسىندا پرەزيدەنت قوعامدا قىزۋ تالقىلانىپ جاتقان سالىق رەفورماسىنا قاتىستى پىكىر ءبىلدىردى, — دەپ جازدى qandastar.kz

مەملەكەت باسشىسى, ۇكىمەت نەگىزگى ەكونوميكالىق جانە الەۋمەتتىك فاكتورلاردى ەسكەرە وتىرىپ, سالىق رەفورماسىنا قاتىستى جاڭا تاسىلدەردى ۇسىنعانىن اتاپ ءوتتى.

— سالىق جۇيەسى, بۇل – بۇكىل مەملەكەتتىك جۇيەنىڭ تىرەگى. بيۋدجەتتە قارجى بولماسا, مەملەكەت ءوز مىندەتىن تولىق اتقارا المايدى, الەۋمەتتىك مىندەتتەمەلەر دە ورىندالمايدى.

كاسىبي ماماندار دا, جالپى جۇرتشىلىق تا قوسىمشا قۇن سالىعىنىڭ مولشەرلەمەسىن كوتەرۋ قاجەتتىگىنە تۇسىنىستىكپەن قارايدى. دەگەنمەن ۇسىنىلعان شارالارعا, سونىڭ ىشىندە, قوسىمشا قۇن سالىعىنا قاتىستى سىن-پىكىرلەر دە ەستىلىپ قالادى. بىراق مۇنداي پايىم شىنايى احۋالعا نەگىزدەلمەگەن.

ءتۇرلى سەبەپكە بايلانىستى وزىنە اۋقىمدى الەۋمەتتىك مىندەتتەمە المايتىن ەلدەر از ەمەس. ال قازاقستاننىڭ بيۋدجەت قارجىسىنىڭ جارتىسىنان كوبى الەۋمەتتىك سالانىڭ ەنشىسىندە.

ءبىزدىڭ ەلىمىز – الەۋمەتتىك مەملەكەت. سوندىقتان ءبىلىم بەرۋ, دەنساۋلىق ساقتاۋ سالالارىنا ينۆەستيتسيا سالۋدى جالعاستىرامىز. بۇل – ءبىزدىڭ كونستيتۋتسيالىق مىندەتىمىز. بىراق شىن مۇقتاج ازاماتتارعا عانا كومەك كورسەتىلۋى كەرەك. قىزمەتىن اسىرا پايدالانۋعا, الاياقتىققا جول بەرىلمەيدى. سوندىقتان باسىمدىق بەرىلمەگەن جوبالارعا بولىنەتىن قارجى ازايادى. بۇل قاجەت شارا ەكەنى ايدان انىق. ۇكىمەت وسى جىلدىڭ سوڭىنا دەيىن ونى قالاي وڭتايلاندىرۋ كەرەكتىگىن ءبىرجولا انىقتاپ الۋعا ءتيىس, — دەدى پرەزيدەنت.

وسى تۇستا پرەزيدەنت زاڭناماداعى ولقىلىقتار بيزنەستى بولشەكتەۋگە جول بەرىپ وتىرعانىن مويىنداۋ كەرەك ەكەنىن دە ايتتى. ونىڭ سوزىنشە, بۇل ماسەلەگە ۇكىمەت تە, دەپۋتاتتار دا جەتە ءمان بەرمەگەن.

— تاعى دا ادەمى كورسەتكىشتەرگە اۋەستەنىپ كەتتىك: ەلىمىزدە ەكى ميلليوننان استام سالىق تولەۋشى, ياعني جەكە كاسىپكەرلەر مەن زاڭدى تۇلعالار تىركەلگەن دەسەدى. بىراق ولاردىڭ قانداي كاسىپورىندار ەكەنىنە, قالاي پايدا بولعانىنا, قانشا سالىق تولەيتىنىنە, ءتىپتى ونى تولەپ جاتىر ما, جوق پا دەگەنگە ەش تالداۋ جاسالماعان. بىراق قۇر كىنالاۋدان ءىس وڭعا باسپايدى.

ەندى احۋالدى شۇعىل تۇزەتۋ قاجەت. ۇكىمەت پەن پارلامەنتكە ايتارىم – زاڭناماعا جەدەل تۇردە ءتيىستى تۇزەتۋلەردى ەنگىزۋ كەرەك»

ءادىل ءارى ءتيىمدى سالىق جۇيەسىن قۇرۋ  ەلىمىزدىڭ بولاشاعىنا, كەيىنگى ۇرپاقتىڭ تۇرمىسىنا تىكەلەي اسەر ەتەتىنىن ۇعىنعان ءجون.

بيلىك بيزنەسكە قولداۋ كورسەتىپ كەلدى, كورسەتە دە بەرەدى. بۇعان كۇمان بولماۋعا ءتيىس. بىراق بيزنەستىڭ ءوزى زاڭدى جانە زاڭسىز بولادى. ءبىز زاڭدى ساقتاۋ, تارتىپكە باعىنۋ كەرەك دەپ جاتامىز. ەندەشە ۇكىمەتتىڭ جانە جالپى بيلىكتىڭ قولداۋ شارالارىنىڭ يگىلىگىن, ءبىرىنشى كەزەكتە, ادال ءارى جاۋاپتى, ەڭ باستىسى, زاڭ اياسىندا جۇمىس ىستەيتىن كاسىپكەرلەر كورۋگە ءتيىس.

سالىق رەفورماسىنا كەلسەك, باتىل شارالاردى ءدال قازىر قابىلداۋ كەرەك. ايتپەسە, بۇدان دا زور قيىندىققا تاپ بولامىز, — دەپ ناقتىلادى مەملەكەت باسشىسى.