Memlekettik baqylaý: Lerýa Merlen iri qurylys sýpermarketi ákimshilik jaýapkershilikke tartyldy

Foto: ashyq derekkóz

Qyrkúıekte Almaty oblysynyń turǵyny óńirdiń Saýda jáne tutynýshylardyń quqyqtaryn qorǵaý departamentine «E-otinish» platformasy arqyly shaǵym qaldyrǵan, dep jazdy qandastar.kz

Azamat óz ótinishinde «Lerýa Merlen» qurylys sýpermarketinen satyp almaq bolǵan taýar baǵa belgisinde 1550 teńge dep kórsetilgenin jazǵan. Biraq kassada bul artıkýlmen tirkelgen taýardy 2880 teńgeden satqan. Osy shaǵymnyń negizinde Almaty oblysy boıynsha Saýda jáne tutynýshylardyń quqyǵyn qorǵaý departamenti iri qurylys sýpermarketine jospardan tys tekserý júrgizdi. Jospardan tys tekseris barysynda saýda obektisinde 2 túrli baǵa kórsetilgeni anyqtaldy. Departament qyzmetkeri shaǵymda kórsetilgen oryndy teksergennen keıin sýpermarket syrtyna qoıylǵan taýar brendtik qurylys taýary ekeni belgili boldy, degenmen satýshy baǵa belgisinde 1550 teńge dep kórsetken.

Ishki saýda qaǵıdalarynyń 54-tarmaǵynyń 2-taraýyna sáıkes, kez kelgen ishki saýda sýbektisi taýardy saýda obektisiniń ishki nemese syrtqy sórelerine qandaı baǵamen rásimdese, satyp alýshyǵa qoıylǵan baǵa belgisimen satýǵa mindetti. QR ÁQBtK-niń 193-babynyń 4-bóligine sáıkes taýardyń quny saýda obektisiniń ishki jáne syrtqy sórelerinde kórsetilgen baǵadan qymbat satylatyn bolsa ákimshilik jaýapkershilik kózdelgen.

Osyǵan baılanysty «Lerýa Merlen» JShS jospardan tys tekserý nátıjeleri boıynsha QR ÁQBtK-niń 193-babynyń 4-bóligine sáıkes Almaty oblysy boıynsha saýda jáne tutynýshylardyń quqyqtaryn qorǵaý Departamenti ákimshilik quqyq buzýshylyq týraly hattama toltyrdy. Ákimshilik aıyppul sýmmasy 30 AEK-ti quraıdy. Sýpermarket ákimshiligi aıyppuldyń tolyq qunynyń 50 paıyzyn tóleý quqyǵyn paıdalandy. Sondaı-aq, QR Kásipkerlik kodeksiniń 152-baby 1-tarmaǵynyń 2-tarmaqshasyna sáıkes JShS basshylyǵyna jergilikti departament tarapynan baǵa belgisine qatysty zańsyzdyqty joıý týraly nusqama engizildi.

Osy oraıda Saýda komıteti kásipkerlerge baǵa belgilerin ornatarda muqııat bolýǵa, Saýda zańnamasynda kórsetilgen talaptardy muqııat oryndaýǵa, tutynýshylardyń quqyqtaryna beı-jaı qaramaýǵa shaqyrady.