«مەملەكەتتىڭ قورعانىس قابىلەتىنە نۇقسان كەلتىرۋ»: قورعانىس مينيسترلىگى مەرزىمدى اسكەري قىزمەتكە قاتىستى پەتيتسيالارعا تۇسىنىكتەمە بەردى

فوتو: قورعانىس مينيسترلىگى

قورعانىس مينيسترلىگى ەلىمىزدەگى مەرزىمدى قىزمەتتىڭ كۇشىن جويۋ تۋرالى ۇسىنىستارعا قاتىستى مالىمدەمە جاسادى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

مينيسترلىك كونستيتۋتسياعا سايكەس «قازاقستان رەسپۋبليكاسىن قورعاۋ-ونىڭ ءاربىر ازاماتىنىڭ قاسيەتتى پارىزى جانە مىندەتى» ەكەنىن اتاپ ءوتتى.

«مەرزىمدى قىزمەتتىڭ كۇشىن جويۋ بۇكىل مەملەكەتتىڭ قاۋىپسىزدىگىنە نۇقسان كەلتىرەدى جانە سىرتقى قاتەرلەر تۋىنداعان جاعدايدا ءوز اۋماعىندا بەيبىتشىلىك پەن تۇراقتىلىقتى قامتاماسىز ەتە المايدى. اكىمشىلىك كودەكسكە سايكەس, “قورعانىس” تاقىرىبى پەتيتسيا نىساناسى بولا المايدى. بۇل باستاما – مەملەكەتتىڭ قورعانىس قابىلەتىنە نۇقسان كەلتىرۋ», – دەلىنگەن مينيسترلىك حابارلاماسىندا.

سونداي-اق مينيسترلىك قازاقستان اسكەرىنىڭ نەگىزگى الەۋەتى كەلىسىمشارت بويىنشا قىزمەت ەتەتىن اسكەريلەردەن قۇرالاتىنىن اتاپ ءوتتى.

«قازاقستان 70-30 اراقاتىناسىن ساقتاي وتىرىپ, كەلىسىمشارتتىق قىزمەتكە باسىمدىق بەرەدى. ەلىمىزدىڭ جاۋىنگەرلىك الەۋەتىن نەگىزىنەن كەلىسىمشارت بويىنشا جۇمىس ىستەيتىن اسكەري قىزمەتكەرلەر قامتاماسىز ەتەدى. 30% مەرزىمدى قىزمەتكە شاقىرىلعان ساربازدار. مەرزىمدى قىزمەتتەگى ساربازدار قىزمەت بارىسىندا اسكەري قىزمەتتىڭ قاراپايىم داعدىلارىن مەڭگەرەدى, جاۋىنگەرلىك جاعدايدا ارەكەت ەتۋدى, وق اتۋدى, جاۋىنگەرلىك ماشينالاردى باسقارۋدى ۇيرەنىپ, فيزيكالىق جانە مورالدىق جاعىنان شىڭدالادى», – دەلىنگەن حابارلامادا.

ەسكە سالساق, بۇعان دەيىن ePetition.kz رەسمي پورتالىندا قازاقستانداعى اسكەري قىزمەتكە قاتىستى ەكى پەتيتسيا پايدا بولعان ەدى. بىرەۋىندە قازاقستاندىقتار مەرزىمدى قىزمەتتەن باس تارتۋدى ۇسىنسا, ەكىنشىسىندە – اسكەرگە شاقىرۋ جاسىن 18 جاستان 20 جاسقا دەيىن ۇلعايتۋ ۇسىنىلدى.