جاڭالىقتار
«مەن پەريزات ەمەسپىن!» – بالاسىنىڭ ەمىنە 1,3 ملرد جيناعان انا ءوز شىندىعىن ايتتى
قازاقستاندا 1,3 ميلليارد تەڭگە كولەمىندە جينالعان قايىرىمدىلىق قاراجاتىنىڭ تالان-تاراجعا ءتۇسۋى قوعامدا ۇلكەن رەزونانس تۋدىردى. قارجى مونيتورينگى اگەنتتىگىنىڭ مالىمەتىنشە, بۇل سومانى بالاسىنىڭ ەمىنە دەپ جيناعان تولقىن توتاقانوۆا مەن ونىڭ كۇيەۋى جەكە باس مۇددەسى ءۇشىن جۇمساعان. تەرگەۋ ناتيجەسىندە Instagram جارناماسىنا جۇزدەگەن ميلليون, قىمبات م ۇلىك پەن قۇمار ويىندارعا ميلليونداعان تەڭگە شىعىندالعانى انىقتالعان. قازىر ەرلى-زايىپتىعا قاتىستى سوت پروتسەسى ءجۇرىپ جاتىر, دەپ حابارلايدى Skifnews.kz اقپارات پورتالى.
الايدا اتالعان ايىپتاۋلارعا جاۋاپ رەتىندە تولقىن توتاقانوۆا Instagram جەلىسىندەگى پاراقشاسىندا ءوز ۇستانىمىن مالىمدەپ, ءوزىن قورعاۋعا تىرىستى.
— مەنى پەريزات قايراتپەن سالىستىرىپ جاتىر. بىراق مەن ەشقاشان بايلىقتا ءومىر سۇرگەن جوقپىن, پاتەر دە, قىمبات كولىك تە العان ەمەسپىن, – دەپ جازدى ول.
ونىڭ ايتۋىنشا, بۇل ىسكە قاتىستى تەرگەۋ مەن سوت ءبىر جىلدان استام ۋاقىتتان بەرى ءجۇرىپ جاتىر جانە ازىرگە ونىڭ كىناسى دالەلدەنبەگەن.
— قازىر بۇل ىستە جاڭا رەزونانس جاساپ, سوتقا قىسىم كورسەتۋ ارەكەتى ءجۇرىپ جاتىر, – دەدى بلوگەر.
تولقىن توتاقانوۆا سونىمەن قاتار ءوزىن بىرنەشە جىلدان بەرى قىسىم مەن قورقىتۋعا ۇشىراعانىن ايتىپ وتىر. ول بالاسىن قۇتقارۋ ءۇشىن جەكە تۇلعالاردان جوعارى پايىزبەن قارىز الىپ, وسىممەن بىرگە 700 ميلليون تەڭگەدەن استام قاراجاتتى قايتارۋعا ءماجبۇر بولعانىن جەتكىزدى.
— مەن بەس جىلدان بەرى شانتاج, قورقىتۋ مەن ءولىم قاۋپىمەن ءومىر ءسۇرىپ كەلەمىن. بۇگىندە مەن رەسمي تۇردە جابىرلەنۋشى رەتىندە تانىلدىم. بۇل – مەن ءۇشىن ادىلەت ىزدەۋدىڭ جالعىز جولى, – دەپ مالىمدەدى ول.
تولقىن توتاقانوۆانىڭ بۇل جازبالارى قوعامدا قىزۋ تالقىعا ءتۇستى. ءبىرى ونى قولداسا, ەندى ءبىرى كۇمانمەن قاراپ وتىر. بۇل جاعداي قايىرىمدىلىق سالاسىنداعى اشىقتىق پەن سەنىمدى باسقارۋدىڭ ماڭىزىن تاعى دا الدىڭعى قاتارعا شىعاردى.
