«مەن سايقىمازاق ەمەسپىن!»: نۇرلان قويانباەۆ رەنىشىن ءبىلدىردى

جۋىردا تۇركىستان وبلىسى اكىمىنىڭ كرەاتيۆتى يندۋستريانى دامىتۋ باعىتى بويىنشا شتاتتان تىس كەڭەسشىسى بولىپ تاعايىندالعان نۇرلان قويانباەۆ الەۋمەتتىك جەلىدە رەنىشىن بىلدىرگەن جازبا قالدىردى, دەپ حابارلايدى qandastar.kz.

مەن قازاقستان رەسپۋبليكاسىنىڭ ازاماتىمىن. قىزىلوردا وبلىسى شيەلى اۋدانىنىڭ تۋماسىمىن. №45 گيمنازيا مەكتەبىن التىنعا ءبىتىردىم. قازاق ۇلتتىق ءال-فارابي ۋنيۆەرسيتەتىنىڭ تاريح فاكۋلتەتىندە ءبىلىم الدىم. ەكونوميكا جانە قۇقىق اكادەمياسىندا فينانس جانە كرەديت ماماندىعىن ءبىتىردىم.

300 ميليوندىق اۋديتورياسى بار, ەڭ ءىرى جاستاردىڭ ويىنىندا, ماسكەۋ قالاسىندا قازاقتىڭ ءازىلىن تورگە شىعارعان كوماندانىڭ كاپيتانى بولدىم. (تەك مىقتى مەملەكەتتەردىڭ عانا ءازىلى دامىعان: اقش, انگليا, فرانتسيا ت.ب) تەلەارنا سالاسىندا باعدارلامامىز 9,3 رەيتينگىمەن رەكوردتىق ناتيجە كورسەتتى. ونى تەلەارنا سالاسىندا قىزمەت اتقاراتىندار, تەلەۆيزيا تاريحىنداعى ەڭ جوعارعى رەيتينگتەرىنىڭ ءبىرى ەكەنىن ايتىپ بەرە الادى.

كينو سالاسىنا كەلىپ, ول سالانىڭ مامانى بولماسام دا, گولليۆۋدتىڭ ءداۋىرىن توقتاتتىم. مەملەكەتتىك بيۋدجەتتەن ءبىر تيىن الماي, جۇمىس ىستەۋگە بولاتىنىن كورسەتتىك. بۇل ءۇردىس جاس رەجيسسەرلەرگە سەرپىن بەرىپ, جول اشىپ, كەيىنگى ۋاقىتتا جىلىنا 120 عا جۋىق وتاندىق فيلمدەر ءتۇسىرىلىپ جاتىر. ياعني, جىل سايىن گولليۆۋدقا كەتەتىن 100 ملن دوللارعا جۋىق اقشا, ەندى ەلىمىزدە قالۋدا. ول دەگەنىمىز 4-5 جىلدا 500 ملن دوللار!

مۇنىڭ بارلىعى كرەاتيۆتىڭ ارقاسىندا. وسى كرەاتيۆتى ويلارىمدى پايدالانىپ ەلىمە قىزمەت ەتكىم كەلەدى.

وبلىس اكىمدەرىمەن كەزدەسىپ, كوپ ويلارىممەن ءبولىسىپ ءجۇرمىن. ازىرگە تەك تۇركىستان وبلىسى عانا كرەاتيۆتى يدەيالارىمدى قولدادى. ەشقانداي ايلىقسىز جانە بيۋدجەتتەن تىس.

بايقاعانىم, كەيبىر جۋرناليستەردىڭ ماقالالارىندا “سايقىمازاق”, “كلوۋن” دەگەن سياقتى سوزدەر شىعۋدا. مەن سايقىمازاق ەمەسپىن, مەن قازاقپىن! ەشكىمگە كەرەك ەمەس, ەشكىم ءمان بەرميتىن ءازىل سالاسىندا 25 جىل ەڭبەك ەتىپ, 5 مىڭ تەڭگەلىك ايلىقتان, 100 ميلليون دوللارلىق يندۋستريانى قالىپتاستىرعان كرەاتيۆتى پروديۋسەرلەردىڭ ءبىرىمىن!

مىسالى, قازاقستان رەسپۋبليكاسىنىڭ اقپارات مينيسترلىگىنىڭ ۆيتسە-ءمينيسترى — كوچەتوۆ ەۆگەني دەگەن ازامات تاعايىندالعاندا ەشكىم شۋلاپ, رەزونانس تۋدىرمادى. مەن دە كوچەتوۆ ەۆگەني سياقتى ەلىمە قىزمەت جاساعىم كەلەدى. نەگە مەن ءوز ەلىمدە ءتىپتى, ايلىعى جوق قىزمەتكە تۇرعاندا, اقتالىپ, پوست جازۋىم كەرەك?!

نەگىزى, نەگاتيۆ جازاتىندار كوپ ەمەس. ايتقىم كەلگەنى, ەلىمىزدى دامىتامىز دەسەك, ءپوزيتيۆتى, تەكتى قازاقتاردىڭ بەلسەندىلىگى قاجەت, — دەپ جازدى نۇرلان قويانباەۆ الەۋمەتتىك جەلىدە.