«مەنىمەن نە ورىس تىلىندە سويلەسەسىڭ, نە مۇلدە سويلەسپەيسىڭ»: دريفت ءتۋرنيرىنىڭ جەتەكشىسى جەلىدەگىلەردىڭ نارازىلىعىن تۋدىردى

Gorilla Drift Championship ءتۋرنيرىنىڭ نەگىزىن قالاۋشى ارتەم چەكمەنەۆتىڭ ۆيدەوسى جەلىدە تارادى. كادرلاردان چەكمەنەۆتىڭ وزىنەن سۇحبات العالى تۇرعان ادامعا دورەكى سويلەگەنىن جانە قازاق تىلىنەن سويلەۋدەن باس تارتقانى تۋرالى اڭعارۋعا بولادى, دەپ حابارلايدى qandastar.kz. Stan.kz-كە سىلتەمە جاساپ.

«مەن تۇسىنەتىن تىلدە سويلەسەسىز نەمەسە مۇلدەم سويلەسپەيسىز. «ەي», دەپ ايەلىڭە ايتاسىڭ. ورىسشا تۇسىنبەيسىڭبەي تۇرسىڭ عوي, باۋىرىم?», – دەدى ول.

چەكمەنوۆتىڭ قاي جەردە تۋعانى بەلگىسىز. اشىق دەرەككوزدەردە ونىڭ شىعۋ تەگى تۋرالى اقپارات جوق.
بەينەروليك الەۋمەتتىك جەلىلەردە داۋ تۋدىردى, كوپتەگەن قولدانۋشىلار چەكمەنەۆتىڭ دورەكىلەنگەن داۋىسى مەن سويلەسۋ تونىن سىناپ تاستادى.

«مىناۋ كىسى قازاقتى, قازاق ءتىلىن قورلاپ تۇر», «جىگىتتەردىڭ سابىرلىعى مىقتى ەكەن. مەن شىدامايتىن ەدىم», «ناتسيست, شوۆينيست باسسىزدىعىندا شەك جوق», ء«تىل ۇيرەنۋ ءۇشىن مي كەرەك!» – دەپ وقىرماندار اشۋىن ءبىلدىردى.

رەداكتسيا ءمان-جايدى تولىعىراق ءبىلۋ ءۇشىن ارتەم چەكمەنوۆتىڭ وزىنە حابارلاسىپ كوردى.

«بۇل جاعداي بويىنشا كەلەسى اپتا پرەسس-كونفەرەنتسيا وتكىزەمىز. سول كەزدە ءبارىن ەگجەي-تەگجەيلى جەتكىزەمىن. قازىر ەشنارسە ايتا المايمىن. تەك ايتارىم, ولار مەنى ارانداتقىسى كەلدى», – دەپ جاۋاپ بەردى ارتەم چەكمەنوۆ.