«مەنىڭ تاپقانىم – مەنىكى»: سارا توقتامىسوۆا وتباسىنداعى قارجى ماسەلەسىنە قاتىستى ويىن ءبولىستى

فوتو: جەكە قورىنان

بەلگىلى ايتىسكەر اقىن سارا توقتامىسوۆا قوعامداعى ايەلدەردىڭ كەيبىر ءىس-ارەكەتتەرى مەن كوزقاراسىن سىنادى. بۇل تۋرالى qandastar.kz  Stan.kz اقپارات اگەنتتىگىنە سىلتەمە جاساپ حابارلايدى.

ايتىسكەر اقىننىڭ ايتۋىنشا, وتباسىلىق بيۋدجەت بىرگە بولىپ, ورتاق ءبىر ماقساتقا جۇمسالۋى كەرەك.

“قازىرگى قوعامدا, اسىرەسە, ءبىز, ايەلدەر كوپ مەنمەندىككە سالىنىپ كەتەمىز. قاي بىلگىشتىڭ ويلاپ تاپقانىن بىلمەيمىن, مىناداي ءسوز بار: مەنىڭ تاپقانىم – مەنىكى, كۇيەۋىمنىڭ تاپقانى – بىزدىكى دەپ ۇرانداتىپ وتىراتىندار بار. قاراڭىزشى, ءسىزدىڭ كۇيەۋىڭىزدىڭ جۇمىسى اياقاستى جۇرمەي قالدى, اياقاستى توقتاپ قالدى. ەسكەرە كەتەيىك, جاتىپىشەر, جالقاۋ, ايەلىنىڭ موينىنا ءومىر بويى ماسىل بولىپ وتىراتىن ەركەكتەر تۋرالى ايتىپ وتىرعان جوقپىن. قوعامدا بار دۇنيەنى ايتىپ وتىرمىن”, – ويىن ءبولىستى اقىن.

ودان كەيىن ونەر يەسى كۇيەۋىنىڭ تابىس تاپپاي قالعانىن ءسوز ەتىپ, ونى سوگەتىن ايەلدەرگە ەسكەرتۋ جاسادى.

“تۋرا وسى كەزدە «وي, مەنىڭ كۇيەۋىم تۇك تاپپايدى, مەنىڭ قالاۋلارىمدى ورىندامايدى, انانى قاراشى, مىنانى قاراشى دەپ ءوزىن كىم كورىنگەنمەن سالىستىرا بەرسەڭ, ايەل ادام ءوز بەرەكەسىن ءوزى قاشىرادى ەكەن. وسى كەزدە نەبىر اقىلگويلەر كوبەيەدى. «ساعان ونىڭ نە كەرەگى بار, ءوزىڭ جاقسى قاراجات تاباسىڭ, سۇلۋسىڭ» دەپ بولمايتىن اقىلىن تىقپالايتىندار تابىلادى. «ايەلگە اقىل كەرەك» دەگەن وسىدان شىققان. اقىلدى جولداس بولسا, ەشبىر ايەل اجىراسپايدى», – دەگەن پىكىر ايتتى سۋىرىپسالما اقىن.

ايتا كەتەيىك, ايتىس الەمىنىڭ جۇلدىزى زورلىق-زومبىلىققا قاتىستى زاڭ اياسىندا پىكىر بىلدىرگەن ەدى.