«Meniń tapqanym – meniki»: Sara Toqtamysova otbasyndaǵy qarjy máselesine qatysty oıyn bólisti

Foto: jeke qorynan

Belgili aıtysker aqyn Sara Toqtamysova qoǵamdaǵy áıelderdiń keıbir is-áreketteri men kózqarasyn synady. Bul týraly qandastar.kz  Stan.kz aqparat agenttigine silteme jasap habarlaıdy.

Aıtysker aqynnyń aıtýynsha, otbasylyq bıýdjet birge bolyp, ortaq bir maqsatqa jumsalýy kerek.

“Qazirgi qoǵamda, ásirese, biz, áıelder kóp menmendikke salynyp ketemiz. Qaı bilgishtiń oılap tapqanyn bilmeımin, mynadaı sóz bar: Meniń tapqanym – meniki, kúıeýimniń tapqany – bizdiki dep urandatyp otyratyndar bar. Qarańyzshy, sizdiń kúıeýińizdiń jumysy aıaqasty júrmeı qaldy, aıaqasty toqtap qaldy. Eskere keteıik, jatypisher, jalqaý, áıeliniń moınyna ómir boıy masyl bolyp otyratyn erkekter týraly aıtyp otyrǵan joqpyn. Qoǵamda bar dúnıeni aıtyp otyrmyn”, – oıyn bólisti aqyn.

Odan keıin óner ıesi kúıeýiniń tabys tappaı qalǵanyn sóz etip, ony sógetin áıelderge eskertý jasady.

“Týra osy kezde «oı, meniń kúıeýim túk tappaıdy, meniń qalaýlarymdy oryndamaıdy, anany qarashy, mynany qarashy dep ózin kim kóringenmen salystyra berseń, áıel adam óz berekesin ózi qashyrady eken. Osy kezde nebir aqylgóıler kóbeıedi. «Saǵan onyń ne keregi bar, óziń jaqsy qarajat tabasyń, sulýsyń» dep bolmaıtyn aqylyn tyqpalaıtyndar tabylady. «Áıelge aqyl kerek» degen osydan shyqqan. Aqyldy joldas bolsa, eshbir áıel ajyraspaıdy», – degen pikir aıtty sýyrypsalma aqyn.

Aıta keteıik, aıtys áleminiń juldyzy zorlyq-zombylyqqa qatysty zań aıasynda pikir bildirgen edi.