Mıllıardtyq urlyq: munaı kásiporyndarynyń basshylary ustaldy

Foto: ru.freepik.com

Qazaqstannyń bes munaı-gaz kásipornynda mıllıard teńgeden astam somaǵa urlyq anyqtaldy, dep habarlaıdy Tengrinews.kz Mańǵystaý oblysynyń prokýratýrasyna silteme jasaı otyryp.

«OılTransportKorporeıshn» JShS-niń («Qazmunaıgaz» AQ enshiles kásiporny) laýazymdy tulǵalary jetkizýshiden 1,5 mıllıard teńgeden astam somaǵa tehnıkalyq erekshelikke sáıkes kelmeıtin avtobýstardy qabyldaǵany anyqtaldy. Oǵan qosa, olardyń qunyn 400 mıllıon teńgege qosty. Sondaı-aq, jumys istemeıtin arnaıy tehnıka qyzmetteri úshin 110 mıllıon teńge mólsherinde aqsha qarajatyn aýdarý faktileri anyqtaldy.

«Basqa kásiporynda – West Oil Software JShS ( «OılTransportKorporeıshn» JShS merdigerlik uıymy) – jumys istemegen adamdarǵa 400 mıllıon teńgeden astam jalaqy tóleý, jalaqyny negizsiz esepteý, onyń ishinde kompanııa basshylyǵynyń jaqyn týystaryna aqsha aýdarý faktileri anyqtaldy», – dep habarlady prokýratýrada.

Atalǵan buzýshylyqtar boıynsha QR QK 189-babynyń 4-bóligi («Senip tapsyrylǵan bóten múlikti iri mólsherde ıemdený nemese ysyrap etý») boıynsha sotqa deıingi bes tergeý bastaldy. Is júrgizý prokýrorlary taǵaıyndaldy.

« Sotqa deıingi tergeý aıasynda atalǵan uıymdardyń tórt basshy laýazymdy tulǵasy ustaldy. Qylmystyq ister oblystyń ekonomıkalyq tergeý departamentiniń óndirisinde jatyr. Basqa málimetter tergeý múddesi úshin jarııa etilmeıdi», – delingen habarlamada.