مينيستر: جازدا ءورت قاۋپى جوعارى بولادى

بيىلعى جاز وتە ىستىق بولادى. وسىنداي بولجامىمەن بولىسكەن ماماندار قۇرعاقشىلىققا بايلانىستى الاڭداۋلى. اسىرەسە ەلىمىزدىڭ باتىسى, شىعىسى مەن وڭتۇستىگىندە اپتاپ ىستىق ۇزاققا سوزىلۋى مۇمكىن. ءورت قاۋپى باسىم.

بيىلدىڭ وزىندە 27 رەت ورمان ءورتى تۇتانعان. قۇزىرلى ۆەدومستۆو باسشىلارى بۇگىن جاز ماۋسىمىنا دايىندىقتى پىسىقتاپ, اتقارىلاتىن ءىس-شارالاردى ۇكىمەت وتىرىسىندا باياندادى.

ەلدە ءورت باقىلاۋ مۇنارالارىنىڭ سانى از. تۇتانعان ءورتتى دەرەۋ اۋىزدىقتاۋ ءۇشىن ونى ۋاقىتىلى انىقتاۋ اسا ماڭىزدى. سونداي-اق, تالاپ بويىنشا ەلدە 729 ورمان ءورتىن ءسوندىرۋ ستانتسياسى بولۋ قاجەت. قولدا بارى 254 قانا. ءورت ءسوندىرۋ كولىكتەرىنىڭ 72%-ءى توزعان. تەكسەرۋ بارىسىندا ءتىپتى 158 جۇرمەيتىن تەحنيكا انىقتالعان. 870 دانا تراكتوردىڭ تەڭ جارتىسى جوندەۋگە دە جارامسىز.

ەرلان نىسانباەۆ, قر ەكولوگيا جانە تابيعي رەسۋرستار ءمينيسترى: – مينيسترلىكتىڭ اۋماقتىق ينسپەكتسيالارى مەملەكەتتىك ورمان يەلەنۋشىلەردىڭ ءورت قاۋىپتى ماۋسىمىنا دايىندىعىن تەكسەردى. تەكسەرۋ پاۆلودار, اقمولا, قوستاناي, جامبىل وبلىستارىنىڭ ورمان مەكەمەلەرى مەن «سەمەي ورمانى» رەزەرۆاتىنىڭ دايىندىعى ناشار ەكەنىن كورسەتتى. دايىندىق جاعدايىنىڭ تومەن بولۋىنىڭ نەگىزگى سەبەپتەرى مىناداي: ورمان ءورت ءسوندىرۋ ستانتسيالارىنىڭ بولماۋى; ءورت ءسوندىرۋ اۆتوكولىكتەرىمەن, تراكتورلارمەن, راديوستانتسيالارمەن جانە قۇرال-سايماندارمەن جەتكىلىكسىز قامتاماسىز ەتىلۋى.

ورمان كۇزەتىنىڭ جەكە قۇرامى سانىنىڭ جەتىسپەۋشىلىگى دە وزەكتى ماسەلە.  اتاپ ايتقاندا, ورمان كۇزەتىنە اقمولا وبلىسىندا 500, شىعىس قازاقستاندا 800-دەن اسا كادر قاجەت. مامان تاپشىلىعىمەن قوسا, ورتكە قارسى زاماناۋي ۇشىرۋ قۇرالدارىن ەنگىزۋ باياۋ ءجۇرىپ جاتىر. مەملەكەتتىك ورمان قورىنىڭ 2%-ى عانا ورمان ءورتىن ەرتە انىقتاۋ جۇيەسىمەن قامتىلعان.  ولجاس بەكتەنوۆ, قر پرەمەر-ءمينيسترى: – بيىلدىڭ وزىندە 30-عا جۋىق ورمان ءورتى تىركەلدى. ماسەلەن, وتكەن جىلى ورتتەن قاتتى زارداپ شەككەن «سەمەي ورمانى» اۋماعى بيىل تاعى دا وتقا وراندى. الماتى وبلىسىندا ىلە-بالقاش تابيعي رەزەرۆاتىنىڭ اۋماعىندا دا قامىس ورتەنىپ, ۇلكەن اۋماققا جايىلىپ كەتتى. اقتوبە, اتىراۋ, قاراعاندى, جامبىل جانە قىزىلوردا وبلىستارىندا قامىس پەن قۋراعان ءشوپ جانىپ, ورتكە ۇلاستى. قازىر مۇددەلى مەملەكەتتىك ورگاندار تابيعي ورتتەردىڭ الدىن الۋ جانە ولاردى جويۋ جونىندەگى ءىس-شارالار جوسپارىن ىسكە اسىرۋدا. الايدا كەيبىر سالالاردا بۇل جۇمىستار ءتيىستى دەڭگەيدە جۇرگىزىلمەي وتىر.  توتەنشە جاعدايلار ءمينيسترى «قازاۆياقۇتقارۋ» قىزمەتىنىڭ 19 بورتى دايىن تۇرعانىن جەتكىزدى. اەروۆيزۋالدى بارلاۋ ءۇشىن 120 درون ازىرلەنگەن. سونداي-اق ءورت قاۋپى قاعيدالارىن بۇزعانى ءۇشىن 630 ادامعا ايىپپۇل سالىنعان.

شىڭعىس ءارىنوۆ, قر توتەنشە جاعدايلار ءمينيسترى: – ەرتەڭ «سەمەي ورمانى» رەزەرۆاتىندا رەسپۋبليكالىق كوماندالىق-شتابتىق وقۋ-جاتتىعۋلار وتكىزەمىز. سونىمەن قاتار, بارلىق وڭىرلەردە ورمان شارۋاشىلىعى مەكەمەلەرىمەن 53 ءورت-تاكتيكالىق وقۋ-جاتتىعۋ وتكىزىلدى. بۇدان باسقا, مينيسترلىكتىڭ وقۋ ورتالىقتارىندا ورمان كۇزەتىنىڭ 1300 جۇمىسشىسى وقۋدان ءوتتى.  بيىل تابيعاتتى قورعاۋ مەكەمەلەرى ءۇشىن 15,4 ملرد تەڭگە ءبولىندى. ماتەريالدىق-تەحنيكالىق جاراقتاندىرۋعا جەرگىلىكتى بيۋدجەتتەن 3,8 ملرد تەڭگە قاراستىرىلىپ وتىر. قازىردە ورمان كۇزەتى مەن ءورت سوندىرۋشىلەرگە ۇستەماقى قوسۋ جوباسى مەملەكەتتىك ورگاندارمەن كەلىسىلگەن. ول الداعى رەسپۋبليكالىق بيۋدجەتتىك كوميسسيانىڭ قاراۋىنا ۇسىنىلادى.