Mınıstr: Jazda órt qaýpi joǵary bolady

Bıylǵy jaz óte ystyq bolady. Osyndaı boljamymen bólisken mamandar qurǵaqshylyqqa baılanysty alańdaýly. Ásirese elimizdiń batysy, shyǵysy men ońtústiginde aptap ystyq uzaqqa sozylýy múmkin. О́rt qaýpi basym.

Bıyldyń ózinde 27 ret orman órti tutanǵan. Quzyrly vedomstvo basshylary búgin jaz maýsymyna daıyndyqty pysyqtap, atqarylatyn is-sharalardy Úkimet otyrysynda baıandady.

Elde órt baqylaý munaralarynyń sany az. Tutanǵan órtti dereý aýyzdyqtaý úshin ony ýaqytyly anyqtaý asa mańyzdy. Sondaı-aq, talap boıynsha elde 729 orman órtin sóndirý stanııasy bolý qajet. Qolda bary 254 qana. О́rt sóndirý kólikteriniń 72%-i tozǵan. Tekserý barysynda tipti 158 júrmeıtin tehnıka anyqtalǵan. 870 dana traktordyń teń jartysy jóndeýge de jaramsyz.

Erlan Nysanbaev, QR Ekologııa jáne tabıǵı resýrstar mınıstri: – Mınıstrliktiń aýmaqtyq ınspekııalary memlekettik orman ıelenýshilerdiń órt qaýipti maýsymyna daıyndyǵyn tekserdi. Tekserý Pavlodar, Aqmola, Qostanaı, Jambyl oblystarynyń orman mekemeleri men «Semeı ormany» rezervatynyń daıyndyǵy nashar ekenin kórsetti. Daıyndyq jaǵdaıynyń tómen bolýynyń negizgi sebepteri mynadaı: orman órt sóndirý stanııalarynyń bolmaýy; órt sóndirý avtokólikterimen, traktorlarmen, radıostanııalarmen jáne qural-saımandarmen jetkiliksiz qamtamasyz etilýi.

Orman kúzetiniń jeke quramy sanynyń jetispeýshiligi de ózekti másele.  Atap aıtqanda, orman kúzetine Aqmola oblysynda 500, Shyǵys Qazaqstanda 800-den asa kadr qajet. Maman tapshylyǵymen qosa, órtke qarsy zamanaýı ushyrý quraldaryn engizý baıaý júrip jatyr. Memlekettik orman qorynyń 2%-y ǵana orman órtin erte anyqtaý júıesimen qamtylǵan.  Oljas Bektenov, QR Premer-mınıstri: – Bıyldyń ózinde 30-ǵa jýyq orman órti tirkeldi. Máselen, ótken jyly órtten qatty zardap shekken «Semeı ormany» aýmaǵy bıyl taǵy da otqa orandy. Almaty oblysynda Ile-Balqash tabıǵı rezervatynyń aýmaǵynda da qamys órtenip, úlken aýmaqqa jaıylyp ketti. Aqtóbe, Atyraý, Qaraǵandy, Jambyl jáne Qyzylorda oblystarynda qamys pen qýraǵan shóp janyp, órtke ulasty. Qazir múddeli memlekettik organdar Tabıǵı órtterdiń aldyn alý jáne olardy joıý jónindegi is-sharalar josparyn iske asyrýda. Alaıda keıbir salalarda bul jumystar tıisti deńgeıde júrgizilmeı otyr.  Tótenshe jaǵdaılar mınıstri «Qazavıaqutqarý» qyzmetiniń 19 borty daıyn turǵanyn jetkizdi. Aerovızýaldy barlaý úshin 120 dron ázirlengen. Sondaı-aq órt qaýpi qaǵıdalaryn buzǵany úshin 630 adamǵa aıyppul salynǵan.

Shyńǵys Árinov, QR Tótenshe jaǵdaılar mınıstri: – Erteń «Semeı ormany» rezervatynda Respýblıkalyq komandalyq-shtabtyq oqý-jattyǵýlar ótkizemiz. Sonymen qatar, barlyq óńirlerde orman sharýashylyǵy mekemelerimen 53 órt-taktıkalyq oqý-jattyǵý ótkizildi. Budan basqa, Mınıstrliktiń oqý ortalyqtarynda orman kúzetiniń 1300 jumysshysy oqýdan ótti.  Bıyl tabıǵatty qorǵaý mekemeleri úshin 15,4 mlrd teńge bólindi. Materıaldyq-tehnıkalyq jaraqtandyrýǵa jergilikti bıýdjetten 3,8 mlrd teńge qarastyrylyp otyr. Qazirde orman kúzeti men órt sóndirýshilerge ústemaqy qosý jobasy memlekettik organdarmen kelisilgen. Ol aldaǵy respýblıkalyq bıýdjettik komıssııanyń qaraýyna usynylady.