«Mınıstrlerdiń betin qyzartpaı-aq qoıaıyn»: Zaıytov Úkimetke syn aıtty

Foto: Kollaj: Massaget.kz

Búgin bıýdjet máseleleri talqylanyp jatqan Parlament otyrysyna Oljas Bektenov bastaǵan mınıstrler kabıneti keldi. Májilis depýtaty Rınat Zaıytov Úkimet basshysy Bektenovke birneshe suraq qoıyp, mınıstrlerdiń jumysyna qatysty syn aıtty, – dep habarlaıdy Qandastar.kz Massaget.kz tilshisine silteme jasap.

«Oljas Abaıuly, jalpy mınıstrler kabınetinde memleket basshysynyń tapsyrmasy boıynsha 400 jaıly mektep salynýy kerek edi. Onyń sany 369-ǵa túsip, 157-ge áli aqsha joq bolyp otyr. 2024 jyldyń sáýirinen bastap eń tómengi jalaqy mólsherin 85 myń teńgege ulǵaıtý kerek edi. Bul da memleket basshysynyń tapsyrmasy. Keshe ekonomıka mınıstriniń aıtýynsha, munda da qozǵalystar joq. 2025 jylǵa deıin jergilikti joldardyń 95%-y jóndelýi kerek edi. Bul da iske asýy neǵaıbyl ekenimen kelisetin shyǵarsyzdar. Taǵysyn taǵy, jetip jatyr. Elge bergen, bizge bergen ýádelerdi aıtyp, eshkimniń betin qyzartpaı-aq qoıaıyn. Osy oraıda suraq: «Mınıstrler kabınetinde sózdiń bátýasynyń bolmaýynyń sebebi nede?» Jáne sizdiń osynyń aldyn alý úshin alda qandaı josparyńyz bar?» – dep saýal joldady Rınat Zaıytov.

BEKTENOVTIŃ JAÝABY

Úkimet basshysy atalǵan tapsyrmalardyń ýaqytynda oryndalmaýy bıýdjettegi qarajat tapshylyǵymen baılanystyrdy.

«Úkimettiń jumysy – memleket basshysynyń tapsyrmasyn oryndaýǵa baǵyttalǵan. Barlyq is-áreketimiz soǵan baılanysty. Bıýdjetti qaraǵan kezde 32 trln teńgege ótinimder tústi. Biraq qolymyzda bar qarajat 15-aq trln teńge. Osy qarajattyń sheńberinde barlyq jumystardy uıymdastyryp jatyrmyz. Ary qaraı ekonomıkamyzdy damytyp, joǵary óndirilgen taýarlardy elde óndirýimiz kerek», – dep jaýap berdi Oljas Bektenov.

Aıta keteıik, búgin Parlamentte «2025-2027 jyldarǵa arnalǵan respýblıkalyq bıýdjet týraly» zań jobasy qaralyp jatyr.