مينيسترلىك 67 ملن دوللار تۇراتىن جويعىش ۇشاقتان ايىرىلدى

فوتو YouTube پلاتفورماسىنان الىندى. اۆتورلىعى: Navy Media كانالى

Associated Press اگەنتتىگىنىڭ حابارلاماسىنا سۇيەنگەن Aikyn.kz, قىمبات ۇشاقتىڭ سۋعا كەتۋ سەبەبىن تۇسىندىرەدى, دەپ جازدى qandastar.kz

ۇشاق انگارعا سۇيرەلىپ بارا جاتقاندا پالۋبادان قۇلاپ, تەڭىزگە باتىپ كەتكەن. فوتو edition.cnn.com سايتىنان الىندى. اۆتورلىعى: ح (Twitter)

امەريكالىق ۇكىمەت دۇيسەنبى كۇنى (28 ءساۋىر) وتە قىمبات اسكەري ۇشاقتان ايىرىلعانىن مويىندادى. وتكەن اپتادا جويعىش ۇشاق ءجۇزىپ بارا جاتقان USS Harry S. Truman ۇشاق تاسىعىش كەمەسىنەن سىرعىپ, سۋعا ءتۇسىپ كەتكەن.

F/A-18 Super Hornet جويعىش ۇشاق بەلگىسىز سەبەپتەرمەن يەمەندەگى حۋسيت ب ۇلىكشىلەرىنىڭ شابۋىلىنا ۇشىراعان كەزدە پالۋبادان قۇلاپ, سۋعا باتقان. بۇل تۋرالى Associated Press اگەنتتىگى حابارلادى. 

USS Truman بىرنەشە اي بويى اتالعان ايماقتا تەرروريستىك توپتاردىڭ ارەكەتىن تەجەپ وتىرۋعا باعىتتالعان ميسسياسىنىڭ ءبىر بولىگى رەتىندە قىزىل تەڭىزگە جىبەرىلگەن. اقش اسكەري-تەڭىز كۇشتەرىنىڭ رەسمي مالىمدەمەسىندە بىلاي دەلىنگەن:

«F/A-18E ۇشاعى انگارعا سۇيرەلىپ بارا جاتقاندا, ەكيپاج باسقارۋدى جوعالتتى. ناتيجەسىندە ۇشاق پەن ونى سۇيرەپ بارا جاتقان تەحنيكا سۋعا قۇلادى. ۇشاقتى سۇيرەگەن تەڭىزشىلەر شەتكە شىعىپ ۇلگەردى. قازىر وقيعا بويىنشا تەرگەۋ ءجۇرىپ جاتىر».

كەمە حۋسيتتەردىڭ اتقىلاۋىنان قاشىپ كۇرت بۇرىلعاندا, ۇشاق پالۋبادان سىرعىپ كەتىپ, تەڭىزگە قۇلاعان. فوتو naked-science.ru سايتىنان الىندى. اۆتورلىعى: U.S. Navy

وقيعا ورنىنان الىنعان العاشقى ەسەپتەرگە سايكەس, USS Harry S. Truman كەمەسى حۋسيتتەردىڭ اتقىلاۋىنان قاشۋ ءۇشىن كۇرت بۇرىلعاندا, جويعىش ۇشاق پالۋبادان سىرعىپ كەتكەن. ۇشاق تەڭىزگە قۇلاپ, بىردەن سۋ تۇبىنە كەتكەن. بۇل وقيعادان ءبىر تەڭىزشى جەڭىل جاراقات العانى ايتىلدى.

2012 جىلعى مالىمەتتەر بويىنشا ۇشاقتىڭ باعاسى شامامەن 67 ميلليون دوللار. ءدال وسى USS Harry S. Truman ۇشاق تاسىعىش كەمەسىنەن 2022 جىلدىڭ 8 شىلدەسىندە تاعى ءبىر F/A-18 ۇشاعى جەرورتا تەڭىزىنە قۇلاعان ەدى. بۇنداي قايتالانۋلار كەمەنىڭ ەكيپاجىنىڭ قاتەلىگىنەن نەمەسە ۇشاقتاعى كەمشىلىكتەردەن بولۋى مۇمكىن.

USS Harry S. Truman 90-عا جۋىق ۇشاق پەن تىكۇشاقتار تاسىمالدايتىن Nimitz ساناتىنداعى اتوم قوزعالتقىشى بار ۇشاق تاسىعىش كەمە. ۇشاق تاسىمالداۋشى كەمەلەردە بۇنداي وقيعالار وتە سيرەك كەزدەسەدى. ويتكەنى ۇشاقتار كەمەگە مىقتى بەكىتىلەدى. بىراق حۋسيتتەردىڭ قىزىل تەڭىزدەگى زىمىراندار مەن دروندارى اقش اسكەري كەمەلەرىنىڭ شۇعىل مانەۆرلار جاساۋعا ءماجبۇر ەتەدى. سونداي ءبىر بۇرىلىستا F/A-18 ۇشاعى تەڭىزگە قۇلاپ كەتكەن بولۋى مۇمكىن.

بيىلعا اقپان ايىندا مىسىردىڭ پورتىندا ساۋدا كەمەسىمەن سوقتىعىسىپ قالعان وسى USS Harry S. Truman كەمەسىنىڭ كومانديرى قىزمەتىنەن قۋىلعان ەدى. بۇل كەمەنىڭ كەلەڭسىز وقيعالارعا ءجيى تاپ بولۋى دا ۇلكەن ماسەلەنىڭ بار ەكەنىن اڭعارتادى.

USS Harry S. Truman كەمەسىنىڭ قازىرگى جاعدايى تۋرالى مىنا ۆيدەودا:

قورعانىس مينيسترىنە تاعى ءبىر سوققى بولدى

بۇل وقيعا – قورعانىس ءمينيسترى پيت حەگسەت ءۇشىن كەزەكتى قيىندىق تۋعىزدى. Fox News-ءتىڭ بۇرىنعى تەلەجۇرگىزۋشىسى رەتىندە تانىمال حەگسەت بۇل قىزمەتكە كەلگەننەن بەرى بىرنەشە داۋلى جاعدايعا ۇشىراعان.

وتكەن ايدا ول قاتەلەسىپ, حۋسيتتەرگە قارسى اسكەري جوسپارلاردى The Atlantic جۋرنالىنىڭ باس رەداكتورىنا Signal ارقىلى جىبەرىپ قويعان. كەيىنىرەك بۇل مالىمەتتەردى قىزمەتتىك چاتقا تىركەلگەن ايەلىنە, باۋىرىنا جانە ادۆوكاتىنا دا تاراتقانى بەلگىلى بولدى. سوڭعى مالىمەتتەرگە قاراعاندا, ول Signal قوسىمشاسىن جەكە كومپيۋتەرىنە «باقىلاۋسىز ارنا» ارقىلى ورناتىپ, قاۋىپسىزدىك پروتوكولدارىن بۇزعان.

حەگسەتكە يميدجگە تىم قۇمار, بىراق باسقارۋ قابىلەتى تومەن دەگەن سىندار ايتىلۋدا. سونداي-اق, ول جاقىندا پەنتاگوندا «بەت-الپەت تۇزەتۋ ستۋدياسىن» ورناتىپ, شەنەۋنىكتەردى مەديا الدىندا جاقسى كورىنۋگە دايىنداۋعا تىرىسقانى ءۇشىن دە سىنعا ۇشىرادى.