مينيسترلىك «شاين مۋسكات» ءجۇزىمىن زەرتحاناعا تەكسەرۋگە جىبەردى

فوتو: اشىق دەرەككوز

ءجۇزىمدى دەنساۋلىق ساقتاۋ مينيسترلىگى زەرتحاناعا تەكسەرۋگە جىبەردى, دەپ حابارلادى qandastar.kz

كتك تەلەارناسىنىڭ مالىمدەۋىنشە, نۋتريتسيولوگتار ونىڭ قۇرامىنداعى قانت ءوزىمىزدىڭ وڭتۇستىكتە وسىرىلگەن جۇزىمنەن الدەقايدا كوپ دەپ دەيدى. دۋباي شوكولادىن شاڭ قاپتىرعان «شاين مۋسكاتتىڭ» باعاسى دا قىمبات. العاش رەت جاپونيادا وندىرىلگەن ەرەكشە جەمىس ءتۇرى از ۋاقىتتا وڭتۇستىك كورەيانى جاۋلاپ, ارتىنشا جارناماسى جەلدەي ەسىپ, بۇكىل الەمگە تارادى. بىزدە دە ىشكەن-جەگەنىن سالعىش بلوگەرلەر وسى جەمىسكە جۇرتتىڭ قىزىعۋشىلىعىن ارتتىرىپ جىبەردى.

الەۋمەتتىك جەلىدە كەڭىنەن تارالعان shine muscat ءجۇزىمى استاناداعى بازارلاردا سامساپ تۇر.

ءبىر قاراعاندا ءپىشىنى وتە ۇلكەن, كادىمگى جۇزىمدەردەن ەكى-ءۇش ەسە ۇلكەن ەكەن. ال ءدامى… قابىعى جۇقا, قىتىرلاق, ءدامى ءتىل ۇيىرەدى, كيۆيدىڭ دامىنە ۇقسايدى, شىرىنى مول. قازىرگى زاماندا اركىمدە «توبىر ينستينكتى» ويناپ, جۇرتتان قالماۋ ءۇشىن الەككە تۇسەتىن كورسەقىزار كوپ. بۇگىندە وسى ءبىر دانەگى جوق جەمىسپەن ۇرتىن تولتىرىپ,  قىتىرلاتا جەپ ۆيدەو ءتۇسىرۋ سانگە اينالدى. بەلگىلى ءبىر الەۋمەتتىك ستاتۋستىڭ بەلگىسىنە اينالدى ما دەرسىڭ…ەسەسىنە, ساتۋشىلار تەمىردى قىزعان كەزدە سوعىپ, ساۋداسىن ابدەن قىزدىرعان. اكەلگەن تاۋارى سول كۇندە-اق تاۋسىلىپ قالىپ جاتىر.

«بۇنىڭ ساتىلىمعا شىققانىنا ءبىر اپتاداي بولدى. سەگىز مىڭنان بولدى, ياعني ءبىر قاپشىعى, كەلىسى. قازىر بەس مىڭ تەڭگەدەن بولىپ جاتىر. ساتىپ الماس بۇرىن, استانا قالاسىندا كوتەرمە بازاردان تەكسەرىپ, اسىقپاي, ءوزىم ءدامىن كوردىم, زەرتحانادان شىققان قاعازىن تەكسەردىك», – دەيدى ساتۋشى ارمان ارتىقباەۆ.

وتكەن ايدا تايلاند زەرتحانالارىندا Shine muscat ءجۇزىمىنىڭ 24 سىناماسى تەكسەرىلىپ, ونىڭ 23-ىندە ۋلى حيميالىق قالدىقتار تابىلعان. مۇنى بىلگەن تاي بيلىگى ورە تۇرەگەلىپ, زياندى ءونىمنىڭ ساتىلىمىنا تىيىم سالدى. ال قازاقستانعا سول كورەي ەلىنەن دە, كورشىلەس قىتايدان دا جۇزىمدەر جاشىك-جاشىگىمەن ەركىن تاسىمالدانىپ جاتىر. جاۋاپتى ۆەدومستۆو ەندى عانا سورەلەردە توردەن ورىن العان جەمىستى تەكسەرۋدى باستاعانىن جەتكىزدى.

«مينيسترلىك كوميتەتىنىڭ ايماقتىق دەپارتامەنتتەرى باقىلاۋعا ساتىپ الۋ ماقساتىندا وسى ءجۇزىمدى ساتىپ الىپ, قازىر ساراپتاۋعا, زەرتحاناعا جولدادى. قازىر ساتىلىمنان الىنعان ونىمدەر تەكسەرىلىپ جاتىر. ميكوتوكسيندەر, توكسيندى ەلەمەنتتەر, پەستيتسيدتەر جانە دە ت.ب. قاۋىپسىزدىك تالاپ بويىنشا تەكسەرىس جۇرگىزىلىپ جاتىر. Shine muscat جۇزىمىنە قاتىستى ۋلانۋ فاكتىcى ازىرگە تىركەلگەن جوق جانە دە تۇتىنۋشى تاراپىنان ارىز-شاعىم تۇسپەدى», – دەيدى دسم سانيتاريا-ەپيدەميولوگيانى باقىلاۋ كوميتەتىنىڭ باس ساراپشىسى داناگاۇل قاسقاتاەۆا.

دەگەنمەن نۋتريتسيولوگ ماماندار ءجۇزىمنىڭ وسى ءتۇرىن تۇتىنباس بۇرىن, ونى مۇقيات اس سوداسىمەن جۋىپ الۋعا كەڭەس بەرەدى. سونداي-اق, ساتۋشىلاردان تاۋاردىڭ قاۋىپسىزدىك سەرتيفيكاتىن سۇراۋ كەرەك ەكەنىن ايتادى.

«باسقا جۇزىمدەرمەن سالىستىرعان كەزدە قانت دەڭگەيى جوعارىراق. ونى تاسىمالداۋ, ساقتاۋ ءۇشىن, ونى ءوسىرۋ كەزىندە قولدانىلاتىن حيميالىق قوسپالار, ياعني پەستيتسيدتەر مولشەرى جوعارى بولۋى مۇمكىن. ياعني ورتالىق جۇيكە جۇيەسىنە, اس قورىتۋ جۇيەسىنە كەرى اسەرىن, قاۋىپتى اسەرىن تيگىزەدى. قانت ديابەتى بار ادامدارعا وتە زيان. ال پەستيتسيدتەر بارلىق ادامعا زيان. اسىرەسە وسال توپ, ول بىزدە بالالار مەن قارت ادامدار», – دەيدى استانا مەديتسينالىق ۋنيۆەرسيتەتى پروفيلاكتيكالىق مەديتسينا عىلىمي زەرتتەۋ ينستيتۋتىنىڭ وقىتۋشىسى قارلىعاش سۇيىندىك.