مۇعالىمدەردى جۇمىسقا قابىلداۋ اۆتوماتتاندىرىلدى

1 ساۋىردەن باستاپ مۇعالىمدەر جۇمىسقا جاڭا جۇيە بويىنشا قابىلدانا باستادى,. ۇلتتىق ءبىلىم بەرۋ دەرەكتەر قورىندا ارنايى مودۋل ىسكە قوسىلدى. وندا كونكۋرستىق راسىمدەر اشىق ءوتىپ, جەمقورلىق ارەكەتتەرگە جول بەرىلمەيدى. اۆتوماتتاندىرىلعان جۇيەنىڭ ارتىقشىلىقتارى قانداي? ەرتەڭگى باسەكەگە قابىلەتتى ماماندارعا جول اشىپ, باعىت-باعدار بەرەتىن ۇلاعاتتى ۇستازدار. زاماناۋي مەكتەپ مۇعالىمدەرى ۇنەمى ۋاقىت تالابىمەن ۇندەسە وتىرىپ, سەنىمدى نىق قادام باسۋى قاجەت.

سوندىقتان شاكىرت تاربيەلەپ, ەل كەلەشەگىن قالايمىن دەگەن پەداگوگتىڭ جۇمىسقا ورنالاسۋىندا كەدەرگى بولماعان ءجون. بۇل باعىتتا ناتيجە بار. ەندى مۇعالىمدەردى مەكتەپكە قابىلداۋ جۇيەسى اۆتوماتتاندىرىلدى. گۇلجانات ابدرامانوۆا, ق. مۇحامەدحانوۆ اتىنداعى №90 گيمنازيانىڭ ديرەكتورى: — وتكەن اپتالاردا بىزدە وسى پەداگوگتەردى جۇمىسقا قابىلداۋ پلاتفورماسى بويىنشا تۇسىندىرمە جاسالدى. قالاي بولادى, قالاي قابىلدايدى دەگەن. ءبىزدىڭ جۇمىسىمىزدا قاعاز جازۋ بار عوي, حاتتاما تولتىرامىز, ءاربىر پەداگوگتى تىركەيمىز قاعاز جۇزىندە, سونىڭ بارلىعى ەلەكتروندى تۇردە ساقتالىپ تۇراتىن بولادى, ءبىر تيىمدىلىگى وسى جاعىنان. جۇمىسقا قابىلداۋ ول جىل بويى پروتسەستە جۇرە بەرەدى, ويتكەنى مەكتەپتە بوس ورىن بولعان جاعدايدا مىندەتتى تۇردە كونكۋرس جاريالانادى. جاڭا مودۋل بۇعان دەيىن شىمكەنت جانە شاحتينسك مەكتەپتەرىندە سىناقتان وتكىزىلدى. جۇيەنى ءارى قاراي وڭتايلاندىرۋ جوسپارلانعان. قازىردە 500 پەداگوگ جۇمىسقا جاڭا تارتىپپەن قابىلدانىپ ۇلگەردى.

قازىردىڭ وزىندە 200-دەن استام مەكتەپ 2000-عا جۋىق بوس ورىنعا بايقاۋ جاريالاپ وتىر. مايرا مارالباەۆا, قر وقۋ-اعارتۋ مينيسترلىگى تسيفرلاندىرۋ دەپارتامەنتى ديرەكتورىنىڭ مىندەتىن اتقارۋشى: — سونىمەن قاتار پەداگوگتەردىڭ مالىمەتتەرىن جيناقتاۋ ماقساتىندا «پەداگوگ پورتفوليوسى» ءمودۋلى ازىرلەندى. بۇل مودۋلدە پەداگوگتەردىڭ بارلىق مالىمەتتەرى جيناقتالادى. ول پەداگوگتىڭ ءبىلىمى, دەنساۋلىققا قاتىستى مالىمەتتەرى, جۇمىس تاجىريبەسى, قۇقىقبۇزۋشىلىقتار, اتتەستاتتاۋدان ءوتۋ, ماراپاتتارى جانە تالىمگەرلىك پەن تسيفرلىق قۇجاتتار تۋرالى ەلەكتروندىق اقپارات ساقتالادى. بۇل مودۋل پەداگوگتەردى اتتەستاتتاۋدان وتكىزۋ كەزىندە پايدالانىلادى. ياعني, پەداگوگتەر اتتەستاتتاۋدان وتكەن كەزدە قۇجاتتاردى قاعاز تۇرىندە جينامايدى.