مۇقاعالي ماقاتاەۆتىڭ ۇلى اكەسىن «سورلى ەركەككە» تەڭەگەن بلوگەردەن 10 ملن تالاپ ەتتى

مۇقاعاليدى سورلى ەركەك دەپ الەمگە جار سالعان الىشەر تەمەنوۆتىڭ ءىسى سوتتا قارالىپ جاتىر, دەپ جازادى qandastar.kz

بلوگەردىڭ ۇستىنەن مۇقاعالي ماقاتاەۆتىڭ ۇلى جۇلدىز ماقاتاەۆ شاعىم تۇسىرگەن, دەپ حابارلايدى Orda.kz.

ول تەمەنوۆكە قاتىستى قىلمىستىق كودەكستىڭ 131-بابى 2-تارماعى «قورلاۋ» فاكتىسى بويىنشا قىلمىستىق ءىس قوزعاۋدى سۇراعان. قىلمىستىق ءىستى الماتىنىڭ ناۋرىزباي اۋداندىق سوتىندا سۋديا بەينەگۇل قايسينا قارادى. اقىرى الماتى قالاسىنىڭ ناۋرىزباي اۋداندىق سوتىندا مۇقاعاليدى قورلاعان بلوگەر الىشەر تەمەنوۆكە قاتىستى سوت باستالدى. ال تەمەنوۆ ادۆوكات جالداماق بولعان, بىراق ءالى تاپپاپتى. سوتقا رەسمي وكىلى مەيىرمان شەكەەۆپەن بىرگە كەلدى. الىشەر تەمەنوۆ سوت زالىندا جۋرناليستەردىڭ بەينەگە تۇسىرۋىنە قارسىلىق ءبىلدىردى.
بلوگەردىڭ رەسمي وكىلى سوتتاسپاي-اق تاتۋلاسۋعا كەلىپ ەدىك دەدى سۋدياعا.

«بۇل ەكى كىسى تۇپتەپ كەلگەندە تۋىس. ءبىر اتانىڭ بالالارى. نەگىزى تەمەنوۆ ءوز ارەكەتى ءۇشىن كەشىرىم سۇراعان. مۇمكىن سىزدەن كەشىرىم سۇراماعان شىعار. ءوزىم دە قارسى بولعانمىن. بىراق ءبىزدىڭ كومەككە جۇگىنگەن سوڭ, كومەكتەسەيىك دەپ شەشتىك. مۇمكىن بولسا, سىزدەن كەشىرىم سۇراساق دەپ ەدىك», — دەدى بلوگەردىڭ رەسمي وكىلى مەيىرمان شەكەەۆ مۇقاعاليدىڭ ۇلى جۇلدىز ماقاتاەۆقا.
سۋديا 10 مينۋت ءۇزىلىس جاريالاپ, ەكى تاراپقا تاتۋلاسۋعا مۇمكىندىك بەردى.
«مەن كۇيزەلىسكە ءتۇستىم, ءبىزدىڭ اتىمىزعا نۇقسان كەلتىردى. مورالدىق شىعىن كەلتىردى. 10 ملن تەڭگە مورالدىق شىعىن وتەسىن. جەلىدە كەشىرىم سۇراسىن. ارى قارايعىسىن كورەمىز», — دەدى جۇلدىز ماقاتاەۆ سوتتا.
ال بلوگەردىڭ رەسمي وكىلى كەلىسىپ كورەمىز دەگەندى ايتتى.

ەسكە سالا كەتەيىك, بىلتىر 8 قازاندا بلوگەر الىشەر تەمەنوۆ الەۋمەتتىك جەلىدە مۇقاعالي ماقاتاەۆتى بىلاپىت سوزدەرمەن قورلاپ بەينەجازبا جاريالادى.
الايدا بلوگەر بەينەجازبالارىن ءوشىرىپ ۇلگەرگەن. الايدا جۇرتتىڭ اشۋىنا تيگەن جازبا لەزدە حالىققا تاراپ كەتتى. مۇقاعاليدىڭ جەرلەستەرى بۇل قورلىققا شىداماي, تەمەنوۆتىڭ ۇيىنە دەيىن بارىپ, ىزدەۋ سالعان. ارتىنان بلوگەر مەن اكەسىن مۇقاعاليدىڭ تۋعان جەرى قاراسازعا اپارىپ, حالىقتان كەشىرىم سۇراتتى.

الىشەر تەمەنوۆ — الماتى وبلىسى ۇيعىر اۋدانى سۇڭقار اۋىلىنىڭ تۇرعىنى. ول سوتتا ءبىر قىزى بارىن جانە ايەلىنىڭ ەكىنشى بالاعا جۇكتى ەكەنىن ايتتى. تۇراقتى جۇمىسى جوق, تەك بلوگەرلىكپەن اينالىسادى. العاش رەت سوتتالىپ جاتىر.

ول جۋرناليستەرگە قانداي دا ءبىر ءۋاج ايتۋدان باس تارتتى.

ال مۇقاعاليدىڭ بالاسى جۇلدىز ماقاتاەۆ:

«وسى كۇنگە دەيىن الدىما كەلىپ كەشىرىم سۇرامادى. كۇيزەلىسكە ءتۇستىم. اكەم مۇقاعالي ايتىپ ەدى «بالام, مەنى حالىق جامانداسىن, ويتكەنى پەندەمىن, بىراق مەنىڭ شىعارمالارىمدى جامانداعان ادامدى كەشىرمەيمىن» دەپ. تەمەنوۆ نە ءۇشىن بۇلاي ايتقانىن تۇسىندىرمەدى, بىراق وكىنەتىنىن ايتتى», — دەدى جۇلدىز ماقاتاەۆ.