مۇناي قالدىعى ەمەس»: اقتاۋدا تەڭىز بەتىندەگى داققا قاتىستى بولجام ايتىلدى

اقتاۋدا تەڭىز جاعالاۋىنداعى سۋ بەتىندە بايقالعان داققا قاتىستى ماڭعىستاۋ وبلىستىق ەكولوگيا دەپارتامەنتىنىڭ ماماندارى بولجامىن جاريالادى.

بىرنەشە كۇن بۇرىن اقتاۋدا تەڭىز جاعالاۋى اۋماعىنان 14 شاقىرىم جەردە, ەكىنشىسى قىزىلقۇم جاعالاۋىنان 48 شاقىرىم جەردە داق بەلگىلەرى بايقالعانى تۋرالى اقپارات جاريالانعان ەدى. دەپارتامەنت ماماندارى تەڭىزدە بىرنەشە كۇدىكتى داق پايدا بولعانى تۋرالى حابارلاما تۇسكەن سوڭ دەرەۋ جۇمىسقا كىرىسكەنىن ايتتى.

«اتالعان وقيعا بويىنشا ەلىمىزدىڭ ۇقك شەكارا قىزمەتىنىڭ ماڭعىستاۋ وبلىسى دەپارتامەنتى كومەگىمەن ماڭعىستاۋ وبلىسى ەكولوگيا دەپارتامەنتىنىڭ ماماندارى شولۋ جانە سۋدان سىناما الۋ جۇمىستارىن جۇرگىزدى. كورسەتىلگەن ورىننان راديۋسى 5-6 شاقىرىم اۋماقتى قوسىمشا شولۋ جۇمىستارى جالعاسىپ, ەشقانداي كۇندىكتى داق تابىلمادى. سىناما ناتيجەسىنە سايكەس تەڭىزدىڭ فوندىق جاعدايىنان اسىپ كەتۋ تىركەلگەن جوق. بۇل اقتاۋ پورتىنا كەلىپ-كەتۋشى «قاراعاندى» جانە «Elegance» كەمەلەرىنەن قالعان توگىندى بولۋى مۇمكىن. ول شيكى نەمەسە اۋىر مۇناي ونىمدەرىنىڭ قالدىعى ەمەس», — دەدى ەكولوگيا دەپارتامەنتىنىڭ وكىلدەرى.
مامانداردىڭ سوزىنشە, تەڭىز سۋىنان الىنعان سىناما قورىتىندىسى بويىنشا زياندى زاتتەكتەردىڭ شامادان تىس ارتۋى تىركىلمەگەن. وسىعان دەيىن ماڭعىستاۋدا كاسپي تەڭىزىنىڭ جاعالاۋى اۋماعىنداعى سۋ بەتىنەن قارا داقتار بايقالعانى تۋرالى اقپارات تاراپ, ءتيىستى تەكسەرۋ جۇمىستارى باستالاتىنى ايتىلعان بولاتىن.