«مىنا جەردى سىپىر!»: كوشە تازالاۋشىنى جىلاتقان بلوگەر قاماۋعا الىندى

الماتىدا «الەۋمەتتىك ەكسپەريمەنت» ءتۇسىرۋ كەزىندە قوعامدىق ءتارتىپتى ورەسكەل بۇزعان ازامات جاۋاپقا تارتىلدى, دەپ حابارلايدى Qandastar.kz اقپارات پورتالى.

«الەۋمەتتىك جەلىلەردە ءبىر جىگىت پەن قىزدىڭ ادەيى قوقىس لاقتىرىپ, كوشە تازالاۋشى ايەلدى بالاعاتتاپ, قورلاعانى تۇسىرىلگەن ۆيدەو تارادى. ولار بۇل ارەكەتتەرىن مازاق سوزدەرمەن سۇيەمەلدەپ, بەينەروليك سوڭىندا بۇل جاي عانا پرانك بولعانىن ايتىپ, كەشىرىم سۇراپ, جابىرلەنۋشىگە اقشا بەرەدى. بۇل جاريالانىم قوعامدا كەڭىنەن رەزونانس تۋدىردى. قولدانۋشىلار مۇنداي كونتەنتكە نارازىلىق ءبىلدىرىپ, ەڭبەك ادامدارىن قورلاۋعا جول بەرۋگە بولمايتىنىن ايتتى. پوليتسيا قىزمەتكەرلەرى جەدەل ارەكەت ەتىپ, قاتىسۋشىلاردىڭ جەكە باسىن انىقتادى, ءىس سوتقا جولداندى», – دەلىنگەن حابارلامادا.

الماتى قالاسىنىڭ اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان اۋدانارالىق سوتىندا ت-عا قاتىستى اكىمشىلىك ءىس قارالدى.

سوت مالىمەتىنشە, ت «الەۋمەتتىك ەكسپەريمەنت» جۇرگىزۋ بارىسىندا قوعامدىق ءتارتىپتى بۇزىپ, قوعامدىق ورىندى لاستاعان جانە اينالاسىنداعى ادامدارعا قۇرمەتسىزدىك تانىتىپ, دورەكى مىنەز-ق ۇلىق كورسەتكەن. بارلىق ارەكە بەينەجازباعا ءتۇسىرىلىپ, كەيىن الەۋمەتتىك جەلىلەردە جاريالانعان.

“سوت وتىرىسىندا ت كىناسىن مويىندادى جانە ءىس ماتەريالدارىندا كورسەتىلگەن دەرەكتەردى راستادى. سوت قاۋلىسىمەن ت اكىمشىلىك قۇقىقبۇزۋشىلىقتىڭ 434-بابىنىڭ 1-بولىگى بويىنشا كىنالى دەپ تانىلىپ, وعان 10 تاۋلىككە اكىمشىلىك قاماۋعا الۋ تۇرىندۋەگى جازا تاعايىندالدى”, – دەپ حابارلادى الماتى سوتى.

سوت قاۋلىسى زاڭدى كۇشىنە ەنگەن جوق.

ەسكە سالايىق, الەۋمەتتىك جەلىدە ەر ادام مەن جۇكتى ايەلدىڭ كوشە تازالاپ جۇرگەن ايەلدەرگە دورەكىلىك كورسەتكەنى تۇسىرىلگەن ۆيدەو ەدى. پرانك ەكەنى ايتىلعان ۆيدەو قاتتى سىنعا ۇشىراپ, قوعامدا قىزۋ تالقىعا ءتۇستى.

ۆيدەودان ەر ادام مەن جۇكتى ايەلدىڭ كوشە تازالاپ جۇرگەن ايەلدەرگە داۋىس كوتەرىپ, «كيىمىمدى لاستادىڭدار» دەپ ايىپتاپ, قوقىس لاقتىرىپ, كەمسىتىپ جاتقانىن كورۋگە بولادى. ءبىر كوشە تازالاۋشى بلوگەرلەردىڭ سوزىنە شىداي الماي, جىلاپ قالادى.